دارالحکومت کے ہائی سیکیورٹی زونز میں پولیس کی بھاری نفری تعینات کر دی گئی ہے جبکہ امن و امان برقرار رکھنے کے لیے پولیس اہلکار الرٹ ڈیوٹی انجام دے رہے ہیں۔
ایس ایس پی سیکیورٹی کیپٹن (ر) ذیشان حیدر نے بتایا کہ اسلام آباد کیپیٹل پولیس کسی بھی ناخوشگوار واقعے سے نمٹنے کے لیے مکمل طور پر تیار ہے۔ کسی بھی شرپسند عنصر کو امن و امان میں خلل ڈالنے کی اجازت نہیں دی جائے گی۔
یہ بھی پڑھیے: ٹی ایل پی نے کیسے پولیس اہلکار اغوا اور گاڑیاں، سرکاری اسلحہ چھینا؟
ترجمان اسلام آباد پولیس کے مطابق دارالحکومت میں شہریوں کی جان و مال کے تحفظ کے لیے پولیس مکمل طور پر الرٹ ہے۔ کسی بھی شرپسند کو قانون ہاتھ میں لینے یا عوام کے لیے مشکلات پیدا کرنے کی ہرگز اجازت نہیں دی جائے گی۔
اسلام آباد پولیس کا کہنا ہے کہ اگر کوئی شخص قانون کو ہاتھ میں لینے کی کوشش بھی کرے گا تو اس کے خلاف سخت اور آہنی ہاتھوں سے کارروائی کی جائے گی۔
ترجمان کے مطابق حساس مقامات پر سیکیورٹی سخت کر دی گئی ہے اور پولیس گشت میں نمایاں اضافہ کیا گیا ہے۔ جدید تکنیکی ذرائع اور سیف سٹی کیمروں کی مدد سے سیکیورٹی کی مانیٹرنگ جاری ہے تاکہ کسی بھی مشکوک سرگرمی کا بروقت سدباب کیا جا سکے۔
ایس ایس پی سیکیورٹی نے مزید کہا کہ دارالحکومت میں امن و امان یقینی بنانے کے لیے سیکیورٹی اقدامات کو مزید مؤثر بنایا جا رہا ہے، جبکہ حساس مقامات کی حفاظت اسلام آباد پولیس کی اولین ترجیح ہے۔
