بنگلہ دیش میں پاکستان کے نئے تعینات ہائی کمشنر عمران حیدر نے مشیر برائے خوراک و زمین علی امام مجمدر سے ملاقات کی۔
ملاقات کے دوران مشیرِ خوراک نے پاکستانی ہائی کمشنر کا گرمجوشی سے استقبال کیا اور دوطرفہ تعلقات، باہمی تعاون اور پاکستان سے چاول کی درآمد سمیت مختلف امور پر تبادلہ خیال کیا۔
یہ بھی پڑھیے: ڈھاکا: تھرڈ میڈ اِن پاکستان ایگزیبیشن کا آغاز، دوطرفہ تجارتی تعلقات کو فروغ دینے کا عزم
یاد رہے کہ 14 جنوری 2025 کو پاکستان سے دو لاکھ میٹرک ٹن چاول کی سرکاری سطح پر درآمد کے لیے مفاہمتی یادداشت (ایم او یو) پر دستخط کیے گئے تھے۔
علاقائی رابطوں پر زور
مشیر علی امام مجمدر نے خطے میں تجارتی روابط کی اہمیت پر زور دیتے ہوئے کہا کہ عبوری حکومت کے تحت اب کراچی بندرگاہ سے کارگو جہاز براہِ راست چٹّوگرام پورٹ پہنچ رہے ہیں، جس سے پاکستان اور بنگلہ دیش کے درمیان تجارت میں نمایاں اضافہ ہوا ہے۔ براہِ راست راستہ اپنانے سے وقت اور اخراجات دونوں میں کمی آئی ہے جو پہلے تیسرے ممالک کے ذریعے درآمدات کے باعث بڑھ جاتے تھے۔
دوطرفہ تعلقات کے استحکام پر اتفاق
یہ بھی پڑھیے: ڈھاکا: برطانوی ہائی کمشنر کی امیر جماعت اسلامی ڈاکٹر شفیق الرحمان سے ملاقات
ہائی کمشنر عمران حیدر نے مشیرِ خوراک کا شکریہ ادا کرتے ہوئے امید ظاہر کی کہ دونوں برادر ممالک عوامی فلاح اور اقتصادی ترقی کے لیے باہمی تعاون کو مزید فروغ دیں گے۔
ملاقات میں پاکستان ہائی کمیشن ڈھاکہ کے پولیٹیکل کاؤنسلر کامران ڈونگل، وزارتِ خوراک کے سیکریٹری محمد مسعود الحسن اور دیگر اعلیٰ حکام بھی شریک تھے۔