پنڈی ٹیسٹ کے تیسرے روز جنوبی افریقا کے بولرز نے پاکستانی ٹاپ آرڈر کو روندتے ہوئے میچ پر اپنی گرفت مضبوط کرلی۔
پاکستان نے 71 رنز کے خسارے کے ساتھ دوسری اننگز کا آغاز کیا، مگر محض 16 کے مجموعی اسکور پر ابتدائی 3 بیٹرز پویلین لوٹ گئے۔ امام الحق 9، عبداللہ شفیق 6 اور کپتان شان مسعود بغیر کوئی رن بنائے آؤٹ ہوئے۔
مزید پڑھیں: آصف آفریدی پاکستان کے دوسرے سب سے عمر رسیدہ ٹیسٹ ڈیبیو کرنے والے کھلاڑی بن گئے
بابر اعظم اور سعود شکیل نے 44 رنز کی شراکت قائم کرکے اننگز کو سہارا دینے کی کوشش کی، لیکن سعود شکیل 11 رنز پر ہارمر کی گیند پر آؤٹ ہوگئے۔
تیسرے دن کے اختتام پر پاکستان نے 4 وکٹوں کے نقصان پر 94 رنز بنا لیے اور مجموعی طور پر 23 رنز کی معمولی برتری حاصل کرلی۔
بابر اعظم 49 جبکہ محمد رضوان 16 رنز کے ساتھ کریز پر ڈٹے ہوئے ہیں۔ جنوبی افریقہ کی جانب سے سائمن ہارمر نے 3 اور کگیسو ربادا نے ایک وکٹ اپنے نام کی۔
اس سے قبل جنوبی افریقہ نے 185 رنز 4 کھلاڑی آؤٹ سے تیسرے دن کا آغاز کیا تو آصف آفریدی نے اپنی چوتھی ہی گیند پر کائل ویرین کو محمد رضوان کے ہاتھوں کیچ آؤٹ کرایا۔ ٹرسٹان اسٹبس 76 اور سائمن ہارمر صرف 2 رنز بنا کر آصف کا شکار بنے۔
ڈیبیو اسپنر آصف آفریدی نے شاندار بولنگ کرتے ہوئے 5 وکٹیں حاصل کیں جس سے پاکستان کو میچ پر غلبہ حاصل ہوتا دکھائی دیا، تاہم سینوران متھوسامی نے کیریئر بیسٹ اننگز کھیل کر میچ کا توازن جنوبی افریقہ کے حق میں موڑ دیا۔
متھوسامی نے کیشو مہاراج کے ساتھ نویں وکٹ پر 71 اور کگیسو ربادا کے ساتھ دسویں وکٹ پر 98 رنز کی قیمتی شراکت قائم کی۔ ربادا 71 رنز بنا کر آصف آفریدی کی چھٹی وکٹ بنے جبکہ متھوسامی 89 رنز پر ناقابلِ شکست رہے۔
جنوبی افریقہ کی ٹیم پاکستان کے 333 رنز کے جواب میں پہلی اننگز میں 404 رنز بنا کر آل آؤٹ ہوئی اور 71 رنز کی سبقت حاصل کی۔
پاکستان کی جانب سے آصف آفریدی نے 6، نعمان علی نے 2، جبکہ شاہین آفریدی اور ساجد خان نے ایک ایک وکٹ حاصل کی۔ آصف آفریدی پاکستان کے دوسرے لیفٹ آرم اسپنر بن گئے جنہوں نے ڈیبیو میچ میں 5 وکٹیں حاصل کرنے کا کارنامہ انجام دیا۔
یہ بھی پڑھیں: راولپنڈی کرکٹ اسٹیڈیم میں ٹیسٹ میچز کے دوران جڑواں شہروں کے لیے خصوصی ٹریفک پلان جاری
راولپنڈی ٹیسٹ کے تیسرے دن جنوبی افریقہ نے پاکستان کے خلاف پہلی اننگز میں 404 رنز بنا کر 71 رنز کی برتری حاصل کر لی۔ پاکستان کی جانب سے ٹیسٹ ڈیبیو کرنے والے اسپنر آصف آفریدی نے 34.3 اوورز میں 79 رنز دے کر 6 وکٹیں حاصل کیں، تاہم ان کی شاندار بولنگ پاکستان کو برتری دلانے میں کامیاب نہ ہو سکی۔
