عمران خان کو دی جانے والی ڈیڈلائن ختم، زمان پارک کا مرشد چوک ویران

پاکستان تحریک انصاف (پی ٹی آئی) کے چیئرمین عمران خان کی رہائش گاہ زمان پارک لاہور میں موجود مبینہ دہشتگردوں کی حوالگی سے متعلق پنجاب حکومت کی طرف سے دی گئی ڈیڈلائن آج 2 بجے ختم ہوچکی ہے جس کے بعد سیکیورٹی اداروں کو ہائی الرٹ کردیا گیا ہے، جبکہ زمان پارک کی طرف جانے والے تمام راستے بند کردیے گئے ہیں۔

سابق وزیرِاعظم اور چیئرمین پاکستان تحریک انصاف عمران خان کی رہائش گاہ ؎کا محاصرہ بدستور جاری ہے اور راستے بند ہونے کے باعث شہریوں کو آمد و رفت میں شدید مشکلات کا سامنا ہے۔

میں نے زمان پارک میں کیا دیکھا

پنجاب کی نگراں حکومت کی جانب سے کہا گیا کہ زمان پارک میں 30 سے 40 دہشت گردوں کی موجودگی کی اطلاعات ہیں۔ یہ بات گزشتہ روز نگران وزیر اطلاعات پنجاب عامر میر نے ایک پریس کانفرنس کے ذریعے صحافیوں اور عوام کو بتاتے ہوئے پاکستان تحریک انصاف (پی ٹی آئی) کو 24 گھنٹے کا الٹی میٹم دے دیا تھا کہ دہشت گردوں کو پولیس کے حوالے کرے ورنہ پی ٹی آئی سربراہ عمران خان کی رہائشگاہ میں پولیس آپریشن ہوگا۔ واضع رہے کہ جنہیں حکومت دہشت گرد قرار دے رہی ہے ان کے بارے میں اس کا کہنا ہے کہ وہ لوگ 9 مئی کے پرتشدد واقعات میں ملوث ہیں۔

زمان پارک جانے والے راستے بدھ سے بند

حکومت نے آپریشن کا الٹی میٹم دینے کے بعد زمان پارک جانے والے تمام راستے بند کر دیے تھے۔ اس کے فوراً بعد جب میں مال روڑ پہنچا تو دیکھا کہ پولیس اہلکار چاروں طرف پھیلے ہوئے ہیں اور کینال کی طرف سے کوئی جاسکتا ہے اور نہ ہی زمان پارک کی طرف سے کوئی ادھر آ سکتا ہے ۔ الغرض زمان پارک پہنچنے والی تمام ملحقہ سٹرکیں کینٹنر لگا کر بند کر دی گی تھیں۔

زمان پارک کے باہر کارکنان غائب تھے

میں نے جیسے ہی ایچیسن کالج کراس کیا تو دیکھا کہ ہر طرف خاموشی ہی خاموشی تھی۔ کوئی ٹریفک نہیں تھا اور نہ ہی کوئی گاڑی کسی جگہ پارک تھی۔ کالج کیمپس جہاں کارکنان کا ہجوم رہتا ہے وہ بھی ویران تھے اور کوئی بھی کارکن اس وقت زمان پارک کے اندر یا باہر دکھائی نہیں دے رہا تھا۔ ہر طرف ایک ہو کا عالم تھا۔

زمان پارک کے باہر پرندوں کا شور اور مرشد چوک

میں چلتے چلتے مرشد چوک پہنچ گیا جہاں دو تین روز پہلے تک میلے ٹھیلے کا سماں ہوتا تھا اور ہر طرف کھانے پینے کے اسٹال لگے ہوتے تھے۔ میں سمجھا کہ کارکنان شاید خان صاحب کے گھر کے گیٹ کے سامنے ہونگے لیکن جب میں پیدل چلتے ہوئے وہاں تک پہنچا تو دیکھا یہاں پر بھی حالات باہر کینال روڑ جیسے ہی تھے صرف چند سیکورٹی کے لوگ تھے اور بس خاموشی تھی۔ پھر یہ سوچ کر کہ شاید گھر کے اندر خان صاحب سے ملاقات کرنے آئے رہنما اور کارکن موجود ہوں میں بالآخر رہائشگاہ کے احاطے میں داخل ہو گیا۔

میں نے دورازہ کھٹکھٹایا اور اندر جانے کی اجازت طلب کی تو پتا چلا کہ عمران خان نے میڈیا کو اندر آنے کی اجازت دی ہوئی ہے تا کہ ان کے ذریعے عوام کو آگاہی مل سکے کہ وہاں کوئی دہشت گرد نہیں ہے۔ میں نے وہیں کھڑے ہوکر فیس بک لائیو شروع کر دیا۔ گھر کی احاطے سے لے کر اس کے عقبی دورازے تک میں کیمرے کے سامنے بتاتا جارہا تھا کہ یہاں میڈیا کے افراد، چند کام کرنے والوں اور سیکورٹی پر تعینات لوگوں کے علاوہ اس وقت کوئی موجود نہیں۔ تاہم میں گھر کے اس ہال تک نہیں گیا جہاں عمران خان اپنے گھر والوں کے ساتھ براجمان تھے۔ خیر میں جو سوچ رہا تھا کہ عمران خان رہنماؤں اور کارکنوں سے ملاقاتیں کر رہے ہونگے لیکن وہاں ویسا کچھ نہیں تھا اور خان صاحب اپنی اہلیہ کے ساتھ زمان پارک والے گھر میں خاموشی کا مزہ لے رہے تھے۔

اس وقت زمان پارک میں صرف میڈیا ہے اور باہر پولیس ہے

اس وقت زمان پارک کے باہر کینال روڑ پر پولیس ہے اور خالی سٹرکوں پر میڈیا کے لوگ ہیں جبکہ جن کی ریڈ لائن عمران خان ہیں وہ اس وقت زمان پارک سے کئی کلومیٹر دور ہیں۔ واضع رہے کہ یہ وہی زمان پارک ہے جہاں مارچ کے مہینے میں پولیس نے عمران خان کو گرفتار کرنے کے لیے آپریشنز کیے تو کارکنان شیلڈ بن کر سامنے آگئے اور وہ 2 دن پولیس کی شدید شیلنگ کے دوران مزاحمت کرتے رہے لیکن اب 9 مئی کی واقعات کے بعد کارکنان ایسے غائب ہیں جیسے گدھے کے سر سے سینگ۔