تھائی لینڈ کی ملکہ مادر سری کٹ 93 برس کی عمر میں انتقال کر گئیں جس پر صدر مملکت آصف علی زرداری اور وزیراعظم شہباز شریف نے اظہارِ افسوس کیا ہے۔
اپنے تعزیتی پیغام میں صدر مملکت نے تھائی بادشاہ، شاہی خاندان اور عوام سے دلی ہمدردی کا اظہار کرتے ہوئے کہا کہ پاکستان کے عوام تھائی قوم کے غم میں برابر کے شریک ہیں۔
انہوں نے مرحومہ کوئین مدر سِری کیت کی خدمات، وقار اور انسانیت کے لیے ان کی کاوشوں کو خراجِ تحسین پیش کیا۔
وزیراعظم شہباز شریف نے تھائی لینڈ کی ملکہ کے انتقال پر گہرے دکھ اور افسوس کا اظہار کرتے ہوئے کہا کہ انہیں ملکہ سری کِٹ کے انتقال کی خبر سن کر گہرا دکھ ہوا۔ انہوں نے کہا کہ پاکستان کے عوام اور حکومت کی جانب سے وہ تھائی لینڈ کے بادشاہ مہا وجیرا لونگ کورن، شاہی خاندان اور تھائی عوام سے دلی تعزیت اور ہمدردی کا اظہار کرتے ہیں۔
یہ بھی پڑھیے: تھائی لینڈ کی سپریم کورٹ نے سابق وزیراعظم تھاکسن شناواترا کو ایک سال قید کی سزا سنادی
وزیراعظم نے کہا کہ اس قومی سوگ کے موقع پر پاکستان کے عوام تھائی عوام کے غم میں برابر کے شریک ہیں اور ان کے لیے دعاگو ہیں۔
Deeply saddened at the passing of Her Majesty Queen Sirikit, the beloved Queen Mother of Thailand. The people and Government of Pakistan join me in extending our deepest condolences to His Majesty King Maha Vajiralongkorn, the Royal Family, and the people of Thailand. Our…
— Shehbaz Sharif (@CMShehbaz) October 25, 2025
تھائی لینڈ کی ملکہ مادر سری کٹ نے جنگِ عظیم کے بعد کے دور میں شاہی خاندان کو نئی شان و شوکت اور وقار بخشا اور جو بعد ازاں کبھی کبھار ملکی سیاست میں بھی متحرک رہیں۔
تھائی شاہی محل کے مطابق ملکہ سری کٹ 2012 میں فالج کے باعث عوامی نگاہوں سے اوجھل ہوگئی تھیں۔ وہ 2019 سے مختلف بیماریوں کے باعث اسپتال میں زیرِ علاج تھیں اور 17 اکتوبر کو خون میں انفیکشن کے باعث ان کی حالت بگڑ گئی، جس کے بعد وہ جمعے کی شب انتقال کر گئیں۔
شاہی محل کی جانب سے اعلان کیا گیا ہے کہ شاہی خاندان اور دربار کے اراکین کے لیے ایک سال کا سوگ منایا جائے گا۔
یہ بھی پڑھیے: پاکستان کا تھائی لینڈ کو بھی ’ فاسٹنگ بدھا‘ کے تاریخی مجسمہ کا تحفہ
تھائی وزیرِاعظم انوتن چرن ویرکُل نے ملکہ والدہ کے انتقال کے باعث اپنی ملائیشیا میں ہونے والی آسیان سمٹ کی شرکت منسوخ کردی ہے۔
حکومتی ترجمان کے مطابق ہفتے کے روز کابینہ کا خصوصی اجلاس طلب کیا گیا ہے، جس میں شاہی جنازے کے انتظامات پر غور کیا جائے گا۔
