برطانوی ماہر نے لیپ ٹاپ کی کارکردگی بڑھانے کے لیے کچھ مفید مشورے پیش کیے ہیں جن پر عمل کر کے آپ اپنے لیپ ٹاپ کی بیٹری کی کارکردگی بہتر بنا سکتے ہیں۔
لندن میں لیپ ٹاپ ٹھیک کرنے والی ایک بڑی فرم ’بیک مارکیٹ‘ کے مالک کیون شیرون کہتے ہیں کہ لیپ ٹاپ کی بیٹری اگر تیزی سے کم ہو رہی ہے تو لیپ ٹاپ کی سیٹنگ کے ذریعے بیٹری کی کارکردگی بہتر کی جا سکتی ہے۔
کیون شیرون کے مطابق لیپ ٹاپ کی بیٹری کو مسلسل چارج کرنے سے بیٹری کمزور ہوتی ہے لہٰذا اس سے اجتناب کیا جائے۔
کیون کا دوسرا مشورہ ہے کہ مہینے میں ایک مرتبہ لیپ ٹاپ استعمال کرتے ہوئے بیٹری کو 20 فیصد تک کم ہونے دیا جائے یعنی لیپ ٹاپ کی بیٹری کو 80 فیصد چارج ہو جائے تو اسے چارجنگ سے ہٹادیں۔
اگرآپ کے میک بک (ایپل لیپ ٹاپ) میں آپریٹنگ سسٹم کا ورژن 10.15.5 ہے تو اس کی بیٹری 80 فیصد سے زائد چارج نہیں ہوتی اور چارجنگ وہیں رک جاتی ہے۔ اگر آپ اپنے ایپل لیپ ٹاپ کی بیٹری 100 فیصد تک چارج کرنا چاہتے ہیں تو اس کے لیے سیٹنگ میں ’ٹو ایکٹویویٹ بیٹری اوپٹیمائزیشن‘ پر جائیں، پھر ’سسٹم پریفرنس‘ پر کلک کیجیے، پھر ’بیٹری ہیلتھ‘ پر جائیں اور ’آپٹمائزڈ بیٹری چارجنگ‘ پر کلک کریں۔
ونڈوز لیپ ٹاپ میں یہ سہولت موجود نہیں لیکن دیگر طریقوں سے اس پرعمل کیا جاسکتا ہے۔ پہلے اسٹارٹ پر کلک کریں، پھر سیٹنگز، پھرٹربل شوٹ، پھر ادر ٹربل شوٹرز، پر جاکر پاور پر جائیں۔ یہاں جاکر کر آپ بیٹری سیٹ کرسکتے ہیں۔
کیون شیرون نے یہ مشورہ بھی دیا ہے کہ لیپ ٹاپ کو نرم سطح پر نہ رکھیں کیونکہ اس سے لیپ ٹاپ کے اندرونی پنکھوں کی ہوا کی راہ متاثر ہوسکتی ہے۔ اس لیے لیپ ٹاپ کی جالی دار ایئروینٹس کو بلاک ہونے سے بچائیں۔ ایسا کرنے سے آپ کا لیپ ٹاپ ٹھنڈا رہے گا۔
بستر اور صوفے وغیرہ پر لیپ ٹاپ رکھنے سے دھاگے اور گردوغبار لیپ ٹاپ کے اندر چلی جاتی ہے جس سے لیپ ٹاپ کے پنکھے کی افادیت کم ہوتی ہے۔
کیون نے ایک اور مشورہ دیا ہے کہ لیپ ٹاپ کے اندرونی حساس حصوں کی صفائی بہت ضروری ہے۔ ماہر لیپ ٹاپ سے باقاعدگی سے اپنے لیپ ٹاپ کی اندرونی صفائی کرواتے رہیں۔
لیپ ٹاپ کے سافٹ ویئر کو اپ ڈیٹ رکھیں تاکہ اس کا سافٹ ویئر اچھی طرح کام کرسکے۔ سافٹ ویئر اپ گریڈیشن ونڈوز اور آئی او ایس دونوں میں موجود ہیں۔