امریکی صدر ڈونلڈ ٹرمپ کی انتظامیہ نے اگلے سال ہونے والے فٹبال ورلڈ کپ کے سلسلے میں امریکا کا سفر کرنے والے غیر ملکی شائقین کے لیے نیا اقدامات شروع کرنے کا اعلان کیا ہے، جس کے تحت انہیں ویزا انٹرویوز تیزی سے حاصل کرنے میں مدد ملے گی۔
اس نئے نظام کو فیفا پاس کا نام دیا گیا ہے، جو پرائیرٹائزڈ اپوائنٹمنٹ شیڈولنگ سسٹم کا مخفف ہے۔ اس کے تحت وہ افراد جنہوں نے فیفا کے ذریعے ورلڈ کپ کے ٹکٹ خریدے ہیں، امریکا کے ویزا انٹرویوز کے لیے ترجیحی وقت حاصل کرسکیں گے۔ اس اقدام کا مقصد ٹرمپ کی سخت امیگریشن پالیسی اور عالمی مسافروں کی بڑھتی ہوئی تعداد کے درمیان توازن قائم کرنا ہے۔
یہ بھی پڑھیے: ’پاکستان میں فٹبال کے فروغ کے لیے ہر ممکن تعاون کریں گے‘، فیفا نائب صدر کا اعلان
فیفا کے صدر جیانی انفانٹینو، جو پیر کے روز ٹرمپ سے وائٹ ہاؤس میں ملاقات کے لیے موجود تھے، نے کہا کہ اگر آپ کے پاس ورلڈ کپ کا ٹکٹ ہے تو آپ کو ویزا کے لیے ترجیحی اپوائنٹمنٹ ملے گی۔ انہوں نے ٹرمپ کی جانب دیکھ کر مزید کہا کہ جناب صدر، آپ نے پہلی ملاقات میں ہی کہا تھا کہ امریکا دنیا کا خیرمقدم کرتا ہے۔
ٹرمپ نے کہا کہ وہ ورلڈ کپ کے شائقین پر زور دیتے ہیں کہ وہ فوراً اپنے ویزوں کے لیے درخواست دیں۔
یہ بھی پڑھیے: فیفا ورلڈ کپ 2026 کے لیے ٹکٹس کی فروخت کا آج سے آغاز، اس بار قیمتیں کیا رکھی گئیں؟
امریکی وزیر خارجہ مارکو روبیو کے مطابق، بڑھتی ہوئی طلب کو پورا کرنے کے لیے دنیا بھر میں 400 سے زیادہ اضافی قونصلر افسر تعینات کیے جا رہے ہیں۔ روبیو نے بتایا کہ دنیا کے تقریباً 80 فیصد حصوں میں مسافر 60 دن کے اندر ویزا انٹرویو حاصل کر سکتے ہیں۔
نئے نظام کے تحت، فیفا کے ٹکٹ ہولڈرز کو ایک فیفا پورٹل فراہم کیا جائے گا، جس کے ذریعے ان کی ویزا درخواست اور انٹرویو کو ترجیحی بنیادوں پر آگے بڑھایا جائے گا۔
روبیو نے واضح کیا کہ ویٹنگ وہی ہوگی جو سب کے لیے ہوتی ہے، فرق صرف یہ ہے کہ ہم انہیں قطار میں اوپر لے جا رہے ہیں۔
یہ بھی پڑھیے: سعودی فٹ بال ٹیم کی بڑی کامیابی، فیفا ورلڈ کپ 2026 کے لیے کوالیفائی کرلیا
آئندہ سال کا ورلڈ کپ کینیڈا، میکسیکو اور امریکا میں مجموعی طور پر 104 میچوں پر مشتمل ہوگا۔ ٹرمپ اس ٹورنامنٹ کو اپنی انتظامیہ کی بڑی ترجیحات میں شمار کرتے ہیں، اور انفانٹینو بارہا وائٹ ہاؤس کا دورہ کر چکے ہیں۔
ٹرمپ نے کہا کہ اگر ہمیں کسی بھی طرح کے مسائل کا خدشہ ہوا تو میں جیانی سے کہوں گا کہ میچ کسی اور شہر منتقل کریں۔
فیفا صدر انفانٹینو نے براہ راست جواب دینے سے گریز کرتے ہوئے کہا کہ ایک کامیاب ورلڈ کپ کے لیے تحفظ اور سلامتی سب سے اہم ہے، اب تک فروخت ہونے والے ٹکٹ اس بات کا ثبوت ہیں کہ لوگ امریکا پر بھروسہ کرتے ہیں۔
