ملک میں شدید گرمی کی پیش گوئی، آج سے بارشوں کا امکان

پاکستان کے محکمہ موسمیات (پی ایم ڈی) نے پیش گوئی کی ہے کہ پیر کو ملک کے بیشترعلاقوں میں موسم انتہائی گرم رہنے جب کہ اسلام آباد، مری، راولپنڈی، کشمیر اور خیبر پختونخوا کے بیشتر مقامات پر 22 سے 26 مئی تک بارش امکان ہے۔

محکمہ موسمیات نے جاری ایک بیان میں کہا ہے کہ پیر کو سندھ، پنجاب، بلوچستان، اسلام آباد اور خیبرپختونخوا کے بیشتر علاقوں میں موسم شدید گرم اور خشک رہے گا۔ جب کہ اگلے ایک سے دو دنوں کے دوران بیشتر میدانی علاقوں میں دن کا درجہ حرارت معمول سے 3 سے 5 ڈگری سینٹی گریڈ زیادہ رہنے کا امکان ہے۔

محکمہ موسمیات نے یہ بھی پیش گوئی کی ہے کہ 22 مئی کو ملک کے مغربی اور بالائی علاقوں میں مغربی ہواؤں کے داخل ہونے کا امکان ہے جس سے گرمی کی شدت میں قدرے کمی کی امید کی جا سکتی ہے جب کہ سندھ کے علاقوں دادو، جیکب آباد اور گردونواح میں گردو غبار اور تیز ہوائیں چلیں گی۔

اسلام آباد میں تیز ہوائیں چلنے کی توقع

محکمہ موسمیات کا یہ بھی کہنا ہے کہ 22 مئی کے بعد اسلام آباد میں گردوغبار اور گرج چمک کے ساتھ تیز ہوائیں چلنے کی بھی توقع ہے۔

اسی طرح شمال مشرقی اور وسطی بلوچستان، خیبرپختونخوا، جنوبی پنجاب اور خطہ پوٹھوہار میں گرج چمک اور تیز ہواؤں کے ساتھ بارش کا امکان بھی ہے۔

23 سے 26 مئی تک سرگودھا، میانوالی، خوشاب، بکھر سمیت پنجاب کے کئی شہروں میں بارش کا امکان ہے۔ بلوچستان میں بھی آج 22 سے 24 مئی تک بارش متوقع ہے۔

محکمہ موسمیات کا مزید کہنا ہے کہ بارش کی وجہ سے ملک میں جاری گرمی کی شدت میں کمی کا امکان ہے۔

کہاں کا درجہ حرارت کیا رہا؟

ادھر گزشتہ 24 گھنٹوں کے دوران موسم شدید گرم اور خشک رہا۔ اسلام آباد جیسے بڑے شہروں میں زیادہ سے زیادہ درجہ حرارت 41 ڈگری سینٹی گریڈ، لاہور 43، کراچی 35، پشاور 39، کوئٹہ 36، جیکب آباد 49، سکھر، خیرپور اور لاڑکانہ میں زیادہ سے زیادہ 46 ڈگری سینٹی گریڈ درجہ حرارت ریکارڈ کیا گیا۔