وفاقی آئینی عدالت میں سائلین کی سہولت کے لیے مختلف ڈیسک قائم کردیئے گئے ہیں، جن کا افتتاح چیف جسٹس وفاقی آئینی عدالت جسٹس امین الدین خان کریں گے۔
ترجمان کے مطابق عدالت میں انفارمیشن ڈیسک اور آئینی ڈیسک کا قیام سائلین کی رہنمائی اور آئینی امور سے متعلق فوری معلومات کی فراہمی کو یقینی بنانے کے لیے عمل میں لایا گیا ہے۔
ان ڈیسکس کے قیام کا مقصد شہریوں کو درپیش قانونی پیچیدگیوں کو کم کرنا، مقدمات سے متعلق معلومات تک آسان رسائی فراہم کرنا اور آئینی مسائل کے حل کے لیے مؤثر معاونت مہیا کرنا ہے۔
عدالتی حکام کا کہنا ہے کہ ڈیسک پر تعینات عملہ شہریوں کی رہنمائی، کیس اسٹیٹس سے متعلق معلومات اور آئینی سوالات کے ابتدائی جواب دینے کی ذمہ داری نبھائے گا۔
چیف جسٹس وفاقی آئینی عدالت امین الدین خان جلد ہی ان ڈیسک کا باقاعدہ طور پر افتتاح کریں گے۔
ویب سائٹ کا اجرا
دوسری جانب وفاقی آئینی عدالت کی نئی اور جدید ویب سائٹ بھی باقاعدہ طور پر لانچ کر دی گئی ہے۔
ترجمان کے مطابق نئی ویب سائٹ پر عدالت کی کاز لسٹ، جاری مقدمات، اور مختلف فیصلے آسانی سے دستیاب ہوں گے، جس سے شہریوں اور وکلا کو تازہ ترین قانونی پیش رفت تک بروقت رسائی حاصل ہوگی۔
ویب سائٹ کے ذریعے ججز کا روسٹر، اہم آئینی امور سے متعلق اپ ڈیٹس اور عدالت کی تمام سرگرمیوں سے متعلق معلومات ایک ہی پلیٹ فارم پر میسر ہوں گی۔
انتظامیہ کے مطابق ویب سائٹ کا مقصد شفافیت میں اضافہ، معلومات کی رسائی کو آسان بنانا اور عدالتی نظام میں جدید آئی ٹی سہولیات کا استعمال فروغ دینا ہے۔
