سندھ کے ضلع کندھ کوٹ میں زنگ آلود راکٹ کا گولا پھٹنے سے پیش آنے والا دل خراش واقعہ پورے علاقے کو سوگوار کر گیا ہے۔ حادثہ زور گڑھ کے قریب ایک زرعی زمین میں پیش آیا جہاں چند بچے مویشی چرا رہے تھے۔
یہ بھی پڑھیں:پشاور: پولیس وین کے قریب بم دھماکا، 4 اہلکار زخمی
میڈیا رپورٹس کے مطابق بچے گولا قبیلے سے تعلق رکھنے والے ایک ہی خاندان کے تھے اور زرعی کھیت میں پڑے راکٹ کے گولے کو ناکارہ سمجھ کر کھیل رہے تھے کہ اچانک دھماکا ہو گیا۔ حادثے میں 3 بچے موقع پر جاں بحق، جبکہ ایک زخمی ہوگیا۔
پولیس کا کہنا ہے کہ گولہ زنگ آلود تھا اور کافی عرصے سے زمین میں پڑا ہوا تھا۔ جاں بحق بچوں کی عمریں 9 سے 12 سال کے درمیان تھیں۔
ایس ایس پی محمد مراد کے مطابق علاقے کو سیل کر کے دھماکے کی نوعیت اور اصل محرکات جاننے کے لیے تحقیقات شروع کر دی گئی ہیں۔
اس افسوس ناک واقعے نے علاقے کے باسیوں میں خوف اور غم کی لہر دوڑا دی ہے، جبکہ رہائشی علاقوں کے نزدیک اسلحہ یا دھماکا خیز مواد کی موجودگی کے حوالے سے سوالات بھی جنم لے رہے ہیں۔
