ٹائٹینک میں ڈوب کر ہلاک ہونیوالے ایک معمر جوڑے سے برآمد ہونے والی سونے کی پاکٹ واچ ریکارڈ 17 لاکھ 80 ہزار پاؤنڈ میں نیلام ہوگئی۔
نیلامی گھر کے مطابق یہ رقم ٹائٹینک سے متعلق کسی بھی شے کے لیے ادا کی جانے والی سب سے بڑی قیمت ہے، اس سے قبل گزشتہ سال ایک اور سنہری پاکٹ واچ 15 لاکھ 60 ہزار پاؤنڈ میں فروخت ہوئی تھی۔
یہ بھی پڑھیں: ٹائٹینک سے لکھے گئے خط کی 4 لاکھ ڈالرز میں نیلامی، خط کی خاص بات کیا ہے؟
یہ 18 قیراط کی جُولز جیرگنسن کمپنی کی کندہ شدہ گھڑی فرسٹ کلاس مسافر اسائیڈور اسٹراس کی ملکیت تھی، جو اپریل 1912 میں جہاز ڈوبنے کے دوران اپنی اہلیہ آئڈا اسٹراس کے ساتھ ہلاک ہوئے۔
A Titanic passenger’s pocket watch sold for a record $2.3 million at auction, becoming the highest price ever paid for Titanic memorabilia. pic.twitter.com/T8uBAMKnVt
— AccuWeather (@accuweather) November 25, 2025
دونوں کو جیمز کیمرون کی فلم ٹائٹینک میں اس جوڑے کے طور پر دکھایا گیا تھا جو آخری لمحوں میں ایک دوسرے کو تھامے ہوئے ہیں۔
گھڑی اسائیڈور اسٹراس کی لاش سے دیگر ذاتی سامان کے ساتھ برآمد ہوئی اور بعد میں خاندان کو واپس کردی گئی تھی، انہیں یہ گھڑی 1888 میں ان کی 43ویں سالگرہ کے موقع پر تحفے میں ملی تھی، جب وہ نیویارک کے مشہور اسٹور ’میسیز‘ کے شراکت دار بنے تھے۔
مزید پڑھیں: ٹائٹینک حادثہ: آخری لمحات میں کیا ہوا تھا، اصل صورتحال کا سراغ لگ گیا
حادثے کی رات یہ جوڑا لائف بوٹس تک پہنچا، لیکن عمر کی وجہ سے جگہ کی پیشکش کے باوجود اسائیڈور نے کہا کہ وہ دوسرے مردوں سے پہلے لفٹ بوٹ میں نہیں بیٹھیں گے۔
آئڈا اسٹراس نے بھی شوہر کو چھوڑنے سے انکار کر دیا اور دونوں کو آخری بار ڈیک چیئرز پر ایک ساتھ بیٹھے دیکھا گیا۔
فرسٹ کلاس ہونے کے باوجود وہ چند ان بدقسمت مسافروں میں شامل تھے جو اس حادثے میں جان سے گئے۔
یہ گھڑی اب تک اسٹراس خاندان ہی کے پاس محفوظ تھی اور اسے ہنری ایلڈرج اینڈ سن کے نیلام گھر میں برطانیہ کے علاقے وِلٹ شائر میں فروخت کیا گیا۔
نیلامی کے دوران آئڈا اسٹراس کا ٹائٹینک کے لیٹر ہیڈ پر لکھا گیا ایک خط ایک لاکھ پاؤنڈ میں بک گیا، جبکہ ٹائٹینک کا مسافروں کی فہرست پر مشتمل ایک دستاویز ایک لاکھ 4 ہزار پاؤنڈ میں فروخت ہوئی۔
آر ایم ایس کارپیتھیا کے عملے کو دی گیا ایک طلائی تمغہ 86 ہزار پاؤنڈ میں نیلام ہوا، ٹائٹینک سے متعلق یادگار اشیا کی اس نیلامی کی مجموعی مالیت 30 لاکھ پاؤنڈ تک جا پہنچی۔
