پاکستانی پاپ اور بھنگڑا موسیقی کے معروف گلوکار ابرار الحق کی ایک ویڈیو سوشل میڈیا پر وائرل ہو رہی ہے، جس پر انہیں شدید تنقید کا سامنا ہے۔
وائرل ویڈیو میں دیکھا جا سکتا ہے کہ لندن میں پرفارمنس کے دوران چیریٹی کے لیے دی جانے والی پچاس پاؤنڈ کی رقم ابرار الحق اپنی جیب میں ڈال لیتے ہیں۔ اس واقعے کے بعد شائقین نے انہیں سخت تنقید کا نشانہ بناتے ہوئے کہا کہ یہ افسوسناک ہے، خاص طور پر ایسے شخص کے لیے جو عوامی سطح پر اپنی ساکھ اعتماد پر قائم کرتا ہے۔
ابرار الحق کی لندن پرفارمنس کے دوران چیریٹی کے پیسے جیب میں ڈالتے ہوئے کی ویڈیو سوشل میڈیا پر وائرل ہوگئی، جس کے بعد شائقین کی جانب سے انہیں سخت تنقید کا سامنا ہے pic.twitter.com/Wz477GjhXk
— Safina Khan (@SafinaKhann) December 2, 2025
کئی صارفین نے سوال اٹھایا کہ جب انہیں معلوم تھا کہ ہر طرف کیمرے موجود ہیں تو انہوں نے ایسی حرکت کیوں کی۔
واضح رہے کہ ابرار الحق جنہیں بھنگڑا کے بادشاہ کے طور پر بھی جانا جاتا ہے ان کی موسیقی دنیا بھر میں مقبول ہے اور ان کے پنجابی گیت پاکستان کی تقریبات اور شادیوں کا لازمی حصہ سمجھے جاتے ہیں۔
یہ بھی پڑھیں: ابرارالحق نے کترینہ کیف کے ساتھ فلم کی پیشکش کیوں ٹھکرائی؟
ان کے معروف گانوں میں ’بلودے گھر‘ اور ’چمکیلی بارات لے کے آپ آئی اے‘ شامل ہیں۔ ابرار الحق نے مختصر عرصے کے لیے سیاست میں بھی حصہ لیا اور تحریکِ انصاف میں شمولیت اختیار کی تھی، تاہم بعد میں انہوں نے سیاست چھوڑنے کا اعلان کیا۔ ابرار الحق نجی تنظیم سہارا فار لائف ٹرسٹ کے بانی اور چیئرمین بھی ہیں۔
