گوگل نے اپنا جدید جیمنی 3 ماڈل متعارف کر کے چیٹ جی پی ٹی کی عالمی برتری کو خطرے میں ڈال دیا۔
یہ بھی پڑھیں: انسان اور چیٹ بوٹ کے تعلق کے لیے خاص لفظ جسے کیمبرج ڈکشنری نے سال 2025 کا ورڈ بھی قرار دے دیا
اس کے بعد اوپن اے آئی کے سی ای او سیم آلٹمین نے کمپنی میں ’کوڈ ریڈ‘ نافذ کر دیا ہے۔
وال اسٹریٹ جرنل کی رپورٹ کے مطابق یہ فیصلہ اس وقت سامنے آیا جب گوگل کے تازہ ترین جیمنی ماڈل نے نہ صرف اہم بینچ مارکس پر اوپن اے آئی کو پیچھے چھوڑا بلکہ کمپنی کے اسٹاک میں بھی نمایاں اضافہ کیا۔
اوپن اے آئی کی بڑی تبدیلیاں
مصنوعی ذہانت کی اس تیز رفتار جنگ میں آگے رہنے کے لیے اوپن اے آئی نے فیصلہ کیا ہے کہ چیٹ جی پی ٹی میں زیادہ ذاتی نوعیت کی خصوصیات شامل کی جائیں۔
جیسے رفتار اور قابل بھروسہ کارکردگی کو بہتر بنایا جائے اور سرچ صلاحیت کو مزید توسیع دی جائے تاکہ زیادہ پیچیدہ سوالات کے جواب دیے جاسکیں۔
مزید پڑھیے: گوگل نے اپنے صارفین کے لیے جیمینی3 پرو پیش کردیا، اس کی حیران کن خصوصیات کیا ہیں؟
اندرونی میمو کے مطابق آلٹمین نے حکم دیا ہے کہ فی الحال دیگر منصوبوں کو مؤخر کر دیا جائے جن میں اے آئی پر مبنی شاپنگ ٹولز، اشتہارات کی نئی خصوصیات اور ذاتی اسسٹنٹ چیٹ جی پی ٹی پلس شامل ہیں۔
چیٹ جی پی ٹی کے سربراہ نک ٹرلی نے ایکس پر لکھا کہ ہماری پوری توجہ چیٹ جی پی ٹی کو مزید طاقتور، استعمال میں آسان اور دنیا بھر کے صارفین کے لیے زیادہ قابل رسائی بنانے پر ہے۔
گوگل کی بڑھتی ہوئی برتری
جیمنی 3 ماڈل اور نئی امیج جنریشن ٹیکنالوجی نینوبنانا کی آمد کے بعد گوگل کے صارفین کی تعداد میں تیزی سے اضافہ ہوا ہے۔
کمپنی کے مطابق جولائی میں 450 ملین فعال صارفین کی تعداد اکتوبر تک بڑھ کر 650 ملین ہو گئی تھی۔
مزید پڑھیں: ایپل اور گوگل میں 1 ارب ڈالر کا معاہدہ، کیا ’سری‘ گوگل کے جیمنی اے آئی سے چلے گا؟
اوپن اے آئی کو نہ صرف گوگل بلکہ اینتھراپک جیسے طاقتور اے آئی ماڈلز سے بھی سخت مقابلے کا سامنا ہے جسے کاروباری اداروں میں خاص مقبولیت حاصل ہے۔
کیا اوپن اے آئی مالی بحران سے دوچار ہے؟
اوپن اے آئی فی الوقت منافع بخش کمپنی نہیں اور اسے اپنی بقا کے لیے مسلسل سرمایہ کاری حاصل کرنی پڑ رہی ہے جو اسے گوگل جیسے ٹیک جائنٹس کے مقابلے میں کمزور پوزیشن میں کھڑا کرتی ہے۔
کمپنی کی مالی پیشگوئیوں کے مطابق منافع تک پہنچنے کے لیے اسے سنہ 2030 تک اپنی سالانہ آمدنی تقریباً 200 ارب ڈالر تک پہنچانی ہوگی۔
یہ بھی پڑھیے: چیٹ جی پی ٹی کا نیا انقلابی فیچر کیا ہے؟
تاہم سیم آلٹمین نے کمپنی کی مالی مشکلات سے متعلق دعوؤں کی تردید کی ہے اور کہا ہے کہ چیٹ جی پی ٹی کے 800 ملین سے زائد ہفتہ وار صارفین ان خدشات کو غلط ثابت کرتے ہیں۔
کوڈ ریڈ کیا ہے؟
کوڈ ریڈ کسی بھی بڑی ٹیک کمپنی میں اس وقت نافذ کیا جاتا ہے جب ادارے کو فوری اور سنجیدہ خطرہ لاحق ہو جائے۔
یہ ایک ہنگامی حالت ہوتی ہے جس میں کمپنی اپنی معمول کی ترجیحات اور منصوبے روک کر اپنی تمام توانائیاں اس مسئلے یا مقابلے پر لگا دیتی ہے جس نے خطرے کی گھنٹی بجا دی ہو۔
اس کا مقصد تیزی سے ردِعمل دینا، نئی حکمتِ عملی بنانا اور اپنے مقام کو لاحق خطرے کو ٹالنا ہوتا ہے۔
مزید پڑھیں: گوگل جیمنی پہلی بار چیٹ جی پی ٹی کو پیچھے چھوڑنے میں کامیاب، یہ کام کیسے ہوا؟
اوپن اے آئی کے معاملے میں کوڈ ریڈ اس لیے نافذ کیا گیا ہے کیونکہ گوگل کے جیمنی 3 ماڈل نے چیٹ جی ٹی کی برتری کو چیلنج کر دیا ہے۔ اس حالت میں کمپنی نے اپنی پوری ٹیم کو ہدایت دے دی ہے کہ وہ فی الحال باقی منصوبوں کو روک کر صرف ایک ہدف پر توجہ دیں جن میں جی پی ٹی کو مزید بہتر، تیز، طاقتور اور مسابقت کے قابل بنانا شامل ہیں۔
