جنوبی ممبئی میں شام کی سیر کے دوران 79 سالہ خاتون کے لاپتہ ہونے سے خاندان میں تشویش کی لہر دوڑ گئی، تاہم ان کی مالا میں نصب جی پی ایس ٹریکر نے چند ہی گھنٹوں میں ان کا سراغ لگا دیا۔
اطلاعات کے مطابق 3 دسمبر کو سیوری کے علاقے میں سائرہ بی تاج الدین مُلّا کو ایک گاڑی نے ٹکر مار دی جس کے بعد راہگیروں نے انہیں فوری طور پر قریبی اسپتال منتقل کیا۔ واقعے کی اطلاع نہ ملنے کے باعث اہل خانہ شدید پریشانی کا شکار رہے۔
یہ بھی پڑھیں: ناروے کے پہاڑوں میں گمشدہ امریکی صحافی 5 روز بعد زندہ بازیاب
خاتون کے پوتے محمد وسیم ایوب مُلّا نے اس وقت جی پی ایس ڈیوائس کو فعال کیا جو انہوں نے اپنی دادی کے تحفظ کے لیے ان کی مالا میں نصب کر رکھی تھی۔ ڈیوائس نے خاتون کی موجودگی کے ای ایم اسپتال میں ظاہر کی جو جائے حادثہ سے تقریباً پانچ کلومیٹر کے فاصلے پر واقع ہے۔
اہلِ خانہ نے اسپتال پہنچ کر خاتون کو زخمی حالت میں پایا، جس کے بعد سر کی چوٹ کے باعث انہیں مزید علاج کے لیے جے جے اسپتال منتقل کر دیا گیا۔ اسپتال انتظامیہ کے مطابق مریضہ کی حالت تسلی بخش ہے۔
