سعودی عرب کے ولی عہد شہزادہ محمد بن سلمان کی سرپرستی میں مومینٹم 2025 ترقیاتی مالیاتی کانفرنس کا افتتاح ریاض کے گورنر شہزادہ فیصل بن بندر نے کردیا۔ قومی ترقیاتی فنڈ کے زیر انتظام یہ کانفرنس 9 سے 11 دسمبر تک جاری رہے گی۔
مزید پڑھیں: سعودی عرب: پاکستانی کلچرل ویک کا شاندار انعقاد
افتتاحی تقریب میں نائب چیئرمین محمد التویجری اور فنڈ کے گورنر ڈاکٹر اسٹیون گرو نے شہزادہ فیصل کا استقبال کیا اور انہیں نمائش میں پیش کیے جانے والے ترقیاتی منصوبوں سے آگاہ کیا۔
خطاب میں محمد التویجری نے کہاکہ قیادت کی سرپرستی اس بات کا ثبوت ہے کہ انسانی سرمایہ کاری پائیدار ترقی کا مرکز ہے۔
انہوں نے بتایا کہ فنڈ نے گزشتہ سال 52 ارب ریال کی معاونت فراہم کی، جو ایک ملین سے زائد افراد کے لیے مفید رہی، اور غیر تیل ملکی پیداوار میں 47 ارب ریال کا اضافہ ہوا۔
مزید بتایا گیا کہ سیاحتی، ثقافتی اور صنعتی شعبوں میں مجموعی طور پر قریباً 7500 منصوبوں کو مدد فراہم کی گئی، جبکہ عالمی سطح پر 100 ممالک میں 800 سے زیادہ منصوبے 21 ارب ڈالر کی لاگت سے سپورٹ کیے گئے۔ توانائی کے شعبے میں گرین ہائیڈروجن اور شمسی منصوبوں میں نمایاں سرمایہ کاری جاری ہے۔
مزید پڑھیں: سعودی عرب میں دسمبر 2025: ملک بھر میں ثقافت، معیشت، سائنس اور کھیلوں کی سرگرمیاں
کانفرنس میں وزرا، ماہرین اور اقتصادی رہنماؤں نے شرکت کی۔ اس کا مقصد قومی ترقیاتی فنڈ کی حکمتِ عملی کو مضبوط بنانا اور ایسے پائیدار نتائج پیدا کرنا ہے جو معیشت اور معاشرے دونوں پر مثبت اثر ڈالیں۔
