پاکستان۔چین مشترکہ چیمبر آف کامرس اینڈ انڈسٹری کے صدر نذیر حسین نے کہا ہے کہ برآمدات پر مبنی معیشت ہی قومی ترقی کا واحد پائیدار راستہ ہے۔
انہوں نے اس بات پر زور دیا کہ پاکستان کو اپنی مصنوعات کے معیار، پیکجنگ اور لیبر اسٹینڈرڈز کو بین الاقوامی معیار کے مطابق ہم آہنگ کرنا ہوگا تاکہ ملکی برآمدات میں نمایاں اضافہ ممکن ہو سکے۔
یہ بھی پڑھیں: پاکستانی معیشت کی بحالی دیکھ کر خوشی ہوئی، چینی سفیر جیانگ ژی ڈونگ
ریڈیو پاکستان سے گفتگو کرتے ہوئے نذیر حسین نے کہا کہ چین پاکستان کی برآمدات بڑھانے کے لیے مکمل تعاون فراہم کر رہا ہے۔
انہوں نے بتایا کہ اس تعاون سے فائدہ اٹھانے کے لیے ضروری ہے کہ ان مصنوعات بالخصوص غذائی اشیا کی نشاندہی کی جائے جن کی چینی منڈیوں میں زیادہ طلب ہے۔
ان کا کہنا تھا کہ اگر پاکستان چینی مارکیٹ کی ضروریات اور رجحانات کو مدنظر رکھتے ہوئے اپنی برآمدی حکمتِ عملی ترتیب دے تو نہ صرف برآمدات میں اضافہ ہوگا بلکہ ملکی معیشت کو بھی طویل مدتی استحکام حاصل ہوگا۔
