سری لنکا کے حکام نے 1996 کے کرکٹ ورلڈ کپ میں قومی ٹیم کو فتح دلانے والے سابق کپتان اور سابق وزیرِ پیٹرولیم ارجنا راناٹنگا کو کرپشن کے الزامات کے تحت گرفتار کرنے کا اعلان کیا ہے۔
گزشتہ روز عدالت کو بتایا گیا کہ ارجنا راناٹنگا اور ان کے بھائی پر تیل کی خریداری کے طویل المدتی معاہدوں کے طریقہ کار میں غیر قانونی تبدیلیاں کرکے مہنگی اسپاٹ خریداری کرنے کا الزام ہے۔
مزید پڑھیں: سری لنکا سیلاب: پاکستان کی امدادی ٹیم خصوصی طیارے کے ذریعے کولمبو پہنچ گئی
اینٹی کرپشن ادارے، کمیشن برائے تفتیشِ رشوت و بدعنوانی کے مطابق 2017 میں کی گئی 27 خریداریوں سے ریاست کو قریباً 800 ملین سری لنکن روپے (اس وقت کے حساب سے 50 لاکھ ڈالر سے زائد) کا نقصان ہوا۔ عدالت کو بتایا گیا کہ ارجنا راناٹنگا اس وقت بیرونِ ملک ہیں اور وطن واپسی پر انہیں گرفتار کرلیا جائے گا۔
ان کے بڑے بھائی دھمیکا راناٹنگا، جو اس وقت سیلون پیٹرولیم کارپوریشن کے چیئرمین تھے، کو پیر کے روز گرفتار کیا گیا تاہم بعد ازاں ضمانت پر رہا کر دیا گیا۔ عدالت نے ان پر بیرونِ ملک سفر پر پابندی عائد کر دی ہے۔ کیس کی اگلی سماعت 13 مارچ کو ہوگی۔
مزید پڑھیں: طوفان ڈٹوا سے تباہی، بنگلادیش نے سری لنکا کے لیے امداد کی کھیپ بھیج دی
یہ کارروائی صدر انورا کمارا دسانائیکے کی حکومت کی جانب سے کرپشن کے خلاف جاری وسیع کریک ڈاؤن کا حصہ ہے۔ واضح رہے کہ راناٹنگا خاندان کے ایک اور فرد پرسانا راناٹنگا کو بھی گزشتہ ماہ انشورنس فراڈ کے ایک مقدمے میں گرفتار کیا گیا تھا، جبکہ وہ پہلے ہی بھتہ خوری کے جرم میں سزا کاٹ رہے ہیں۔
