نجی ٹی وی چینل کے اینکر پرسن سمیع ابراہیم اسلام آباد میں آبپارہ کے نزدیک گرفتار کرلیے گئے۔
سمیع ابراہیم کے دفتری ساتھی صدیق جان کا کہنا ہے کہ انہیں تھانہ آبپارہ کے نزدیک شاہراہ سیونتھ ایوینیو سے گرفتار کیا گیا ہے تاہم یہ ابھی واضح نہیں کہ ان پر الزام کیا ہے۔
ٹی وی چینل پر اینکر کے سوال کے جواب میں صدیق جان نے کہا کہ اس بات کا علم ابھی تک نہیں ہوسکا کہ سمیع ابراہیم کو کس کیس میں گرفتار کیا گیا ہے اور ایسا بھی نہیں تھا کہ ان کے خلاف کوئی انکوائری چل رہی ہو یا پولیس سے چھپ رہے ہوں۔
صدیق جان کا مزید کہنا تھا کہ نہ تو سمیع ابراہیم کو کوئی نوٹس ملا تھا اور نہ ہی کوئی فون کال آئی تھی پھر بھی جب وہ دفتر سے نکلے تو انہیں اٹھا لیا گیا جو کہ ایک افسوسناک امر ہے۔
انہوں نے کہا کہ اسلام آباد ہائیکورٹ نے ارشد شریف کیس کی سماعت کے دوران یہ حکم جاری کیا تھا کہ خواہ اسلام آباد پولیس ہو یا کوئی اور ادارہ سمیع ابراہیم کو گرفتار کرنے سے پہلے عدالت کی اجازت لے لیکن اس حکم کی بھی خلاف ورزی کی گئی ہے جس پر ٹی وی چینل کے وکلا توہین عدالت کی درخواست دائر کرنے پر غور کر رہے ہیں۔