بھارتی ریاست بہار میں ایک شخص کو 3 سال کے دوران 3 خواتین سے شادی کرنے پر گرفتار کر لیا گیا۔ یہ کارروائی پہلی اور دوسری بیویوں کی جانب سے درج شکایات کے بعد عمل میں آئی جنہوں نے گھریلو تشدد اور جہیز ہراسانی کے الزامات عائد کیے تھے۔
گرفتار شخص نے تمام الزامات کی تردید کرتے ہوئے کہا کہ جہیز کے حوالے سے جو کچھ کہا گیا وہ جھوٹ ہے ہم نے ایک روپیہ بھی نہیں لیا۔ پنٹو بارنوال نے 3 شادیاں کرنے کا اعتراف کیا لیکن اسے اپنی ماں کی دیکھ بھال کی ضرورت کے تحت غیر ارادی عمل قرار دیا۔
یہ بھی پڑھیں: بھارتی شوہر دوسری شادی کی کوشش کر رہا ہے، پاکستانی خاتون کی نریندر مودی سے مداخلت کی اپیل
اپنی پہلی بیوی خوشبو کے بارے میں بات کرتے ہوئے بارنوال نے الزام لگایا کہ گاؤں والے جانتے ہیں کہ پہلی بیوی خوشبو چھری لے کر مجھے اور میری ماں کو مارنے آئی تھی۔انہوں نے ایف آئی آر میں درج ریپ کے الزامات کو بھی بالکل جھوٹ قرار دیا۔
تیسری شادی کے بارے میں بارنوال نے اپنی بزرگ ماں کی صحت کو وجہ بتایا۔ انہوں نے کہا کہ میری ماں بوڑھی اور بیمار ہیں، دل کی بیماری اور ذیابیطس میں مبتلا ہیں۔ گھر میں ان کی دیکھ بھال کے لیے کوئی نہیں تھا۔ میں خود بھی کھانا نہیں بنا سکتا تھا اس لیے مجھے شادی کرنے پر مجبور ہونا پڑا۔
یہ بھی پڑھیں: بھارتی اداکارہ ماہیما چوہدری کی دوسری شادی کی ویڈیو وائرل، اصل معاملہ کیا ہے؟
انہوں نے مزید کہا کہ تیسری بیوی ایک سال تک گھر میں رہی اور کوئی شکایت نہیں کی۔ انہوں نے یہ بھی الزام لگایا کہ پہلی اور دوسری بیوی نے خفیہ طور پر ان کے خلاف سازش کی۔
بارنوال کے دعووں کے برعکس خوشبو کمار نے جہیز ہراسانی، تشدد اور ترک کرنے کا الزام لگایا۔ انہوں نے کہا کہ ہماری شادی 2 دسمبر 2022 کو گوری شنکر لاؤنج میں ہوئی۔ 3 دسمبر کو میں ان کے گھر گئی۔ جھگڑے اور تنازع کے بعد میرے والد نے انہیں 3 لاکھ روپے تحفے کے طور پر دیے ساتھ ہی 20 گرام کا ہار، 15 گرام کی انگوٹھی، دیگر زیورات اور گھریلو سامان دیا۔
یہ بھی پڑھیں: دوسری شادی کی اجازت کیوں نہ دی، شوہر کے ہاتھوں بیوی کا قتل
انہوں نے مزید کہا کہ انہیں بار بار اذیت دی گئی اور آخرکار گھر سے نکال دیا گیا۔ بعد میں انہیں معلوم ہوا کہ بارنوال نے طلاق لیے بغیر دوبارہ شادی کر لی۔ دوسری بیوی کا 10 ماہ کا بچہ ہے اور تیسری بیوی کا 1 ماہ کا بچہ ہے۔
دوسری بیوی گڑیا کمار نے بھی بارنوال پر دھوکہ دہی اور ترک کرنے کا الزام لگایا۔ انہوں نے کہا کہ میں پنٹو کی دوسری بیوی تھی۔ مجھ سے شادی کرنے کے بعد اس نے مجھے بتائے بغیر اور طلاق لیے بغیر کسی اور عورت سے شادی کر لی۔
انہوں نے دعویٰ کیا کہ بارنوال اور ان کے خاندان نے بار بار جہیز کا مطالبہ کیا اور ان کا تاریخ مالی فائدے کے لیے شادی کرنے کی رہی ہے۔ اس نے بہت سی لڑکیوں کی زندگی تباہ کر دی ہے۔ اور کتنی لڑکیوں کو نقصان پہنچائے گا؟ گڑیا نے کہا کہ ہم انصاف چاہتے ہیں، اور اسے سزا ملنی چاہیے۔
