وزیرِ اعلیٰ پنجاب مریم نواز نے واہگہ بارڈر کراسنگ پر نئے تعمیر شدہ ایرینا کا افتتاح کیا، جس میں ایک میوزیم اور تقسیمِ ہند کے موضوع پر قائم کیا گیا پارک بھی شامل ہے۔
مشرقی لاہور کے قریب واقع واہگہ بارڈر پاکستان اور بھارت کے درمیان زمینی آمدورفت کا اہم ترین راستہ ہے اور دونوں ہمسایہ ممالک کے درمیان اکثر کشیدہ تعلقات کی ایک نمایاں علامت سمجھا جاتا ہے۔
یہ بھی پڑھیں: پنجاب حکومت نے سالٹ رینج اور کوہِ سلیمان میں 9.4 ارب روپے کے 2 بڑے ماحولیاتی منصوبے منظور کرلیے
میڈیا رپورٹس کے مطابق، وزیرِ اعلیٰ مریم نواز نے فوجی حکام کے ہمراہ واہگہ بارڈر کا دورہ کیا اور نئے ایرینا کا افتتاح کیا، جہاں نشستوں کی تعداد 7,500 سے بڑھا کر 25,000 کر دی گئی ہے۔ انہوں نے یادگارِ شہدا پر بھی حاضری دی اور فاتحہ خوانی کی۔
واہگہ بارڈر پر نیا ارینا تیار!
وزیرِاعلیٰ پنجاب مریم نواز نے توسیعی منصوبے کا افتتاح کر دیا
جس کے بعد بیٹھنے کی جگہ 25 ہزار تک پہنچ گئی ہے۔ تقریب میں کور کمانڈر لاہور اور صوبائی وزراء بھی شریک ہوئے۔ وسیع پارکنگ اور بلند ترین قومی پرچم اس مقام کو سیاحت کے لیے مزید پرکشش بناتے ہیں pic.twitter.com/JJrib40B88— میاں عامر 🦁 (@LegiMian) January 1, 2026
واضح رہے کہ یہ مقام قیدیوں کے تبادلے اور محدود مسافروں کی نقل و حرکت کے لیے استعمال ہوتا ہے، تاہم سیکیورٹی خدشات کے باعث یہاں سخت نگرانی برقرار رکھی جاتی ہے۔
یہ جگہ روزانہ ہونے والی پرچم اتارنے کی تقریب کے باعث عالمی شہرت رکھتی ہے، جو دونوں ممالک کی سرحدی افواج کی جانب سے پیش کی جانے والی ایک منظم اور علامتی عسکری رسم ہے۔
مزید پڑھیں: پنجاب میں فلم انڈسٹری کے فروغ کے لیے ’پنجاب فلم ڈویلپمنٹ اتھارٹی‘ کے قیام کا بل پیش
اس تقریب کو دیکھنے کے لیے روزانہ ہزاروں تماشائی آتے ہیں، وقت کے ساتھ یہ تقریب ایک بڑی سیاحتی کشش بن چکی ہے، جس میں حب الوطنی کے جذبات اور عوامی جوش و خروش کا امتزاج نظر آتا ہے۔
یہ پاکستان کے سب سے زیادہ دیکھے جانے والے مقامات میں شمار ہوتی ہے، جو بھارت کے اٹاری بارڈر سے جڑی ہوئی ہے۔
ایرینا کی توسیع کے ساتھ ساتھ جوائنٹ چیک پوسٹ واہگہ پر کئی نئی تعمیرات بھی کی گئی ہیں، جن میں برصغیر کی تقسیم کو اجاگر کرنے والا ایک تھیم پارک شامل ہے۔ اس پارک میں ریلوے اسٹیشن کے ماڈلز، فوجی سازوسامان اور یادگارِ شہدا شامل ہیں۔
میڈیا رپورٹس کے مطابق ایرینا کے اندر ایک پاکستان میوزیم بھی قائم کیا گیا ہے، جس میں تحریکِ آزادی سے موجودہ دور تک پاکستان کی تاریخ اور ثقافت کو اجاگر کیا گیا ہے۔
