پاکستان کرکٹ بورڈ (پی سی بی) نے ٹی20 ورلڈ کپ 2026 کے لیے ابتدائی اسکواڈ کے نام انٹرنیشنل کرکٹ کونسل (آئی سی سی) کو جمع کرا دیے ہیں۔ ابتدائی 15 رکنی اسکواڈ کے ساتھ ریزرو کھلاڑیوں کے نام بھی آئی سی سی کو بھیجے گئے ہیں۔
یہ بھی پڑھیں:ٹی20 ورلڈ کپ سے قبل قومی کرکٹ ٹیم کے دورہ سری لنکا کا اعلان
میڈیا رپورٹ کے مطابق ابتدائی اسکواڈ کے ناموں کی ڈیڈ لائن کے مطابق پی سی بی نے بروقت نام جمع کرائے ہیں۔ آئی سی سی کی اجازت کے بغیر پی سی بی 31 جنوری تک اسکواڈ میں تبدیلی کر سکتا ہے، اس کے بعد ٹیم میں کسی بھی تبدیلی کے لیے آئی سی سی کی تکنیکی کمیٹی کی منظوری ضروری ہوگی۔
ابتدائی اسکواڈ میں بابر اعظم، شاہین آفریدی اور حارث رؤف کے نام شامل ہیں، جو دورۂ سری لنکا کے لیے منتخب کھلاڑیوں کے ساتھ شامل کیے گئے ہیں۔ پی سی بی کا ارادہ ہے کہ سری لنکا کے خلاف سیریز میں ایک یا 2 کھلاڑیوں کی کارکردگی کو پرکھنے کے بعد ورلڈ کپ اور آسٹریلیا کے خلاف سیریز کے حتمی اسکواڈ کا اعلان کیا جائے۔
دورۂ سری لنکا کا اسکواڈ
سری لنکا کے لیے منتخب اسکواڈ میں کپتان سلمان علی آغا، عبدالصمد، ابرار احمد، فہیم اشرف، فخر زمان، خواجہ محمد نافع اور محمد نواز شامل ہیں۔ اس کے علاوہ محمد سلمان مرزا، محمد وسیم جونیئر، نسیم شاہ، صاحبزادہ فرحان، صائم ایوب، شاداب خان، عثمان خان اور عثمان طارق بھی ٹیم کا حصہ ہیں۔
یہ بھی پڑھیں:ابرار احمد کی دھوم، آئی سی سی ٹی ٹوئنٹی رینکنگ میں ٹاپ فور میں شامل
واضح رہے کہ آئی سی سی ٹی20 ورلڈ کپ 7 فروری سے بھارت اور سری لنکا میں شروع ہو رہا ہے، اور پاکستان کے تمام میچز سری لنکا میں ہی کھیلے جائیں گے۔
