کراچی میں عالمی معیار کی میراتھن، اسرار خٹک نے فل میراتھن جیت لی

کراچی میں منعقد ہونے والی بی وائی ڈی کراچی میرا تھن میں قومی ایتھلیٹ اسرار خٹک نے شاندار کارکردگی کا مظاہرہ کرتے ہوئے فل میراتھن جیت لی۔

عالمی معیار کی اس میراتھن کا آغاز نشانِ پاکستان سے ہوا، جس میں خواتین، بچوں اور پیشہ ور رنرز سمیت ہزاروں افراد نے شرکت کی۔ رنرز نے سی ویو سے گولف کلب تک دوڑ مکمل کی اور دوبارہ نشانِ پاکستان پہنچے۔

فل اور ہاف میراتھن کا روٹ

ہاف میراتھن کے شرکا نے ایک چکر جبکہ 42.2 کلومیٹر کی فل میراتھن کے شرکا نے 2 چکر مکمل کیے۔ ایونٹ میں فل اور ہاف میراتھن کے علاوہ 5 کلومیٹر فن رن اور 10 کلومیٹر ریلے ریس بھی شامل تھی۔

فل میراتھن کے نتائج

فل میراتھن میں اسرار خٹک نے 42.1 کلومیٹر کا فاصلہ 2 گھنٹے 39 منٹ 58 سیکنڈز میں طے کر کے پہلی پوزیشن حاصل کی۔ حماس منہاس نے 2 گھنٹے 48 منٹ 59 سیکنڈز کے وقت کے ساتھ دوسری پوزیشن حاصل کی۔

یہ بھی پڑھیے ’رن فار کراچی‘ : میراتھن 2026 آج منعقد ہوگی

ہاف میراتھن کے فاتحین

کراچی ہاف میراتھن محمد اختر نے 1 گھنٹہ 19 منٹ 29 سیکنڈز میں جیت لی۔ عطاالصمد دوسرے جبکہ فیضان فیضی تیسرے نمبر پر رہے۔

ویمنز کیٹیگری کے نتائج

ویمنز فل میراتھن میں سارہ لودھی نے 42.1 کلومیٹر کا فاصلہ 3 گھنٹے 33 منٹ 28 سیکنڈز میں مکمل کر کے پہلی پوزیشن حاصل کی، جبکہ ایلیسا ڈائس دوسرے نمبر پر رہیں۔

ویمنز ہاف میراتھن کوکب سرور نے 1 گھنٹہ 53 منٹ 57 سیکنڈز میں جیت لی، رابعہ نعیم نے دوسری اور ضحیٰ پوناوالا نے تیسری پوزیشن حاصل کی۔

شرکت کا ریکارڈ

واضح رہے کہ کراچی میراتھن میں مجموعی طور پر ساڑھے 6 ہزار رنرز نے حصہ لیا، جن میں ایک ہزار خواتین شامل تھیں۔ اس کے علاوہ 25 ممالک سے تعلق رکھنے والے 30 غیر ملکی رنرز بھی اس عالمی معیار کی دوڑ میں شریک ہوئے۔