چین میں ایک شہری کو اپنی بیوی کے کینسر کے علاج میں مدد کے لیے نامعلوم شخص کی جانب سے 50 ٹن شکر قندی عطیہ کیے جانے کا واقعہ سامنے آیا ہے، جس نے سوشل میڈیا صارفین کے دل جیت لیے ہیں۔
یہ بھی پڑھیں: نابینا بیوی سے وفاداری، چینی شوہر نے لاکھوں دل جیت لیے
جنوبی چین مارننگ پوسٹ کی رپورٹ کے مطابق 35 سالہ جیا چانگ لونگ کو یہ غیر معمولی عطیہ ایک ایسے شخص کی جانب سے ملا جس کی شناخت صرف فانگ کے نام سے سامنے آئی ہے۔ جیا کی اہلیہ لی کو جولائی میں ایکیوٹ مائیلوئیڈ لیوکیمیا کی تشخیص ہوئی تھی اور ابتدائی علاج کے بعد وہ اس وقت گھر پر صحتیابی کے مرحلے میں ہیں۔
رپورٹ کے مطابق جیا چانگ لونگ اپنی اہلیہ کے علاج پر اب تک 350,000 یوان خرچ کر چکے ہیں، جو ذاتی بچت اور دوستوں و رشتہ داروں سے ادھار لے کر جمع کیے گئے۔ ڈاکٹروں کے مطابق آئندہ مرحلے میں بون میرو ٹرانسپلانٹ درکار ہے، جس پر مزید تقریباً 400,000 یوان خرچ ہوں گے۔
یہ بھی پڑھیں: بیوی کی آخری خواہش پوری، شوہر نے کینسر کے مریضوں کے لیے وِگ بینک قائم کردیا
جیا اور ان کی اہلیہ اسکول کے زمانے کے ہم جماعت رہے ہیں اور اس وقت صوبہ شینڈونگ کے شہر یانتائی میں رہائش پذیر ہیں۔ ان کا ایک 8 سالہ بیٹا بھی ہے۔
علاج کے اخراجات پورے کرنے کے لیے جیا نے جنان شہر میں سڑک کنارے شکر قندی فروخت کرنا شروع کردی۔ جیا کے مطابق، 350,000 یوان ہماری جمع پونجی اور دوستوں رشتہ داروں سے ادھار لے کر پورے ہوئے، مگر اب ہم سب سے ادھار لے چکے ہیں، یہاں تک کہ میں نے اپنا کمپیوٹر بھی بیچ دیا، اب بیچنے کو کچھ نہیں بچا۔
جیا نے کہا کہ ان کی اور اہلیہ کی مشترکہ خواہش صرف یہ ہے کہ وہ دونوں مل کر اپنے بچے کو بڑا ہوتا دیکھ سکیں۔
یہ بھی پڑھیں: شوہر کے بدترین جنسی تشدد کا شکار ہونے والی بیوی زندگی کی بازی ہار گئی
اسی دوران جیا کی زندگی میں ایک غیر متوقع موڑ آیا جب ایک نامعلوم شخص فانگ نے میسجنگ ایپ کے ذریعے ان سے رابطہ کیا اور 50 ٹن شکر قندی دینے کی پیشکش کی۔ فانگ خود بھی شکر قندی کاشت کرتے ہیں اور ان کا کہنا تھا کہ یہ نوجوان بہت ذمہ دار ہے اور مشکل وقت سے گزر رہا ہے، اسی لیے میں نے مدد کرنے کا فیصلہ کیا۔
یہ واقعہ چین میں انسانیت، ہمدردی اور اجتماعی احساس کی ایک روشن مثال بن کر سامنے آیا ہے۔
