امریکا کے وزیر تجارت ہاورڈ لٹنک نے انکشاف کیا ہے کہ بھارت اور امریکا کے درمیان مجوزہ تجارتی معاہدہ اس وجہ سے تاخیر کا شکار ہوا کیونکہ بھارتی وزیر اعظم نریندر مودی نے معاہدہ حتمی شکل دینے کے لیے امریکی صدر ڈونلڈ ٹرمپ کو ٹیلی فون کال نہیں کی۔
یہ بھی پڑھیں: مودی کے اوساں خطا، ٹرمپ کا ایک اور وار، لداخ کے معاملے پر 2 ممالک کے درمیان پھڈا، جنگ کا خطرہ
جمعے کے روز ایک امریکی پوڈکاسٹ شو ’آل اِن‘ کو دیے گئے انٹرویو میں ہاورڈ لٹنک نے کہا کہ دونوں ممالک کے درمیان تجارتی معاہدہ تقریباً طے پا چکا تھا تاہم آخری مرحلے پر مودی کی جانب سے صدر ٹرمپ کو فون نہ کیے جانے کے باعث بات آگے نہ بڑھ سکی۔
لٹنک کے مطابق سب کچھ تیار تھا صرف یہ ضروری تھا کہ مودی صدر کو فون کریں مگر وہ ایسا کرنے میں ہچکچاہٹ کا شکار رہے۔ یوں مودی نے کال نہیں کی اور معاملہ وہیں رک گیا۔
واضح رہے کہ گزشتہ سال تجارتی مذاکرات ناکام ہونے کے بعد صدر ٹرمپ نے اگست میں بھارتی مصنوعات پر ٹیرف دگنا کر کے 50 فیصد کر دیا تھا جو عالمی سطح پر سب سے زیادہ شرح سمجھی جاتی ہے۔ ان میں 25 فیصد اضافی ٹیرف بھارت کی جانب سے روسی تیل کی خریداری کے ردعمل میں عائد کیا گیا تھا۔
#BREAKING: US Commerce Secretary Howard Lutnick says the India–US trade deal fell through because Prime Minister Modi did not call President Trump.
“I set the deal up. But Modi had to call President Trump. They were uncomfortable with it, so Modi didn’t call.” pic.twitter.com/5PpiGjVEF4
— Aditya Raj Kaul (@AdityaRajKaul) January 9, 2026
یہ بیان ایسے وقت سامنے آیا ہے جب صدر ٹرمپ نے رواں ہفتے بھارت کو خبردار کیا تھا کہ اگر اس نے روس سے تیل کی درآمدات میں کمی نہ کی تو ٹیرف مزید بڑھائے جا سکتے ہیں۔ اس انتباہ کے بعد بھارتی روپے کی قدر تاریخی کم ترین سطح پر آ گئی جبکہ سرمایہ کار بھی غیر یقینی صورتحال کا شکار ہو گئے۔
امریکی وزیر تجارت نے مزید کہا کہ بھارت اب بھی امریکا کی جانب سے برطانیہ اور ویتنام کو دی گئی پیشکشوں کے درمیان کسی ٹیرف ریٹ کا خواہاں ہے تاہم اس حوالے سے پیش کی گئی پیشکش کی مدت ختم ہو چکی ہے۔
دوسری جانب بھارتی وزارت تجارت نے لٹنک کے ان بیانات پر تبصرے کے لیے بھیجی گئی ای میل کا فوری طور پر کوئی جواب نہیں دیا۔
خبر رساں ادارے رائٹرز کے مطابق گزشتہ سال نئی دہلی اور واشنگٹن تجارتی معاہدے کے بہت قریب پہنچ چکے تھے تاہم رابطے میں خلل کے باعث ممکنہ معاہدہ ختم ہو گیا۔
مزید پڑھیں: مودی کو فون پر بتا دیا کہ پاکستان اور انڈیا کی جنگ نہیں ہونی چاہیے، صدر ڈونلڈ ٹرمپ
رائٹرز نے مذاکرات میں شامل ایک بھارتی سرکاری عہدیدار کے حوالے سے بتایا کہ وزیر اعظم مودی کو خدشہ تھا کہ صدر ٹرمپ سے براہ راست فون پر ہونے والی یک طرفہ گفتگو انہیں مشکل صورتحال میں ڈال سکتی ہے اسی لیے کال نہیں کی گئی۔
