معاونِ خصوصی برائے پرائس کنٹرول اینڈ ایکوموڈیٹیز ڈیپارٹمنٹ پنجاب سلمیٰ بٹ نے پریس کانفرنس سے خطاب کرتے ہوئے کہا ہے کہ وزیراعلیٰ پنجاب مریم نواز شریف کا ویژن عوام اور کسانوں کو براہِ راست سہولیات فراہم کرنا ہے، جس پر عملی طور پر تیزی سے کام ہو رہا ہے۔ مریم نواز ہمیشہ کسان کے ساتھ کھڑی نظر آتی ہیں اور ریلیف کو عوام کی دہلیز تک پہنچایا جا رہا ہے۔
مزید پڑھیں: وزیر اعلیٰ پنجاب مریم نواز نے صوبے بھر میں اسٹروک سینٹرز قائم کرنے کی منظوری دے دی
سلمیٰ بٹ نے کہا کہ وزیراعلیٰ مریم نواز نے کسانوں کی خوشحالی کے لیے ہنگامی اور تاریخی اقدامات کیے ہیں، جس کے باعث کسانوں کا ان پر مکمل اعتماد ہے۔ گندم کی بوائی کے مرحلے پر بیج اور کھاد پر 125 ارب روپے کی سبسڈی دی گئی، جس کے نتیجے میں پنجاب میں نہ صرف گندم کا ہدف پورا ہوا بلکہ 5 لاکھ ایکڑ اضافی رقبے پر کاشت بھی ہوئی۔
انہوں نے بتایا کہ پنجاب گندم 2026 پالیسی کے تحت گندم کی قیمت 3500 روپے فی من مقرر کی گئی ہے، جبکہ پرائیویٹ سیکٹر کے ذریعے 35 لاکھ میٹرک ٹن گندم خریدی جائے گی۔ گندم کی خریداری اور سٹوریج کی ذمہ داری بھی پرائیویٹ سیکٹر کو سونپی گئی ہے، جبکہ حکومت نگرانی اور شفافیت کو یقینی بنائے گی۔
سلمیٰ بٹ کے مطابق پنجاب ملک کا پہلا صوبہ بن گیا ہے جہاں سرکاری نظام کے بجائے پرائیویٹ لیڈ گندم خریداری ماڈل متعارف کرایا گیا ہے۔ اوپن بڈنگ کے تحت پرائیویٹ سیکٹر کا انتخاب ہوگا، جبکہ حکومت، پرائیویٹ سیکٹر اور بینکس اس عمل میں اسٹریٹجک پارٹنرز ہوں گے۔
مزید پڑھیں: سوشل میڈیا پر مریم نواز اور ادارے کے خلاف پوسٹ کرنے والا ملزم گرفتار
انہوں نے مزید کہا کہ گندم پالیسی کے تحت ڈیجیٹل پیمنٹ سسٹم نافذ کیا جا رہا ہے تاکہ شفافیت برقرار رہے، جبکہ ویئر ہاؤسز کو بھی آؤٹ سورس کیا جائے گا۔ کسی بھی ممکنہ شارٹ فال کی صورت میں اسٹریٹجک ذخائر مؤثر کردار ادا کریں گے۔
معاون خصوصی نے کہا کہ وزیراعلیٰ پنجاب نے ہمیشہ اپنے وعدے پورے کیے ہیں اور ہر گزرتے دن کے ساتھ نئے ریلیف اقدامات کا اعلان ہو رہا ہے۔ گندم پالیسی ہو یا کسانوں کی خوشحالی، مریم نواز ہمیشہ کسان کے ساتھ کھڑی نظر آتی ہیں اور ریلیف کو عوام کی دہلیز تک پہنچایا جا رہا ہے۔
