انڈونیشیا کے وزیر دفاع نے وفد کے ہمراہ پاکستان ایئر فورس کے ہیڈکوارٹر کا دورہ کیا، اور چیف آف ایئر اسٹاف ایئر چیف مارشل ظہیر احمد بابر سدھو سے ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران پاکستان اور انڈونیشیا کے درمیان تاریخی اور برادرانہ تعلقات کی توثیق کی گئی، جبکہ دونوں ممالک کی فضائی افواج کے درمیان دو طرفہ تعاون کو مزید مضبوط بنانے پر تبادلہ خیال کیا گیا۔
مزید پڑھیں: فیلڈ مارشل عاصم منیر سے انڈونیشیا کے وزیر دفاع کی ملاقات، دفاعی تعلقات بڑھانے کی خواہش کا اظہار
گفتگو میں بالخصوص استعداد کار میں اضافے، تربیت اور ٹیکنالوجی کے شعبوں میں تعاون پر توجہ دی گئی۔
ایئر چیف نے وفد کو پاکستان ایئر فورس کو جدت کی راہ پر گامزن کرنے کے عمل پر بریفنگ دی، جس میں انفراسٹرکچر کی ترقی، تربیتی نظام کی بہتری اور ملٹی ڈومین آپریشنز کے لیے مخصوص صلاحیتوں کے حصول سے متعلق اقدامات شامل تھے۔
انڈونیشیا کے وزیر دفاع نے پاکستان ایئر فورس کی پیشہ ورانہ صلاحیتوں، جنگی تیاری اور نیشنل ایرو اسپیس سائنس اینڈ ٹیکنالوجی پارک کے تحت مقامی سطح پر دفاعی ترقی کے اقدامات کو سراہا۔
انہوں نے تربیت، ہوا بازی اور ایرو اسپیس کے شعبوں میں تعاون کو مزید وسعت دینے میں گہری دلچسپی کا اظہار بھی کیا۔
ملاقات سے پاکستان اور انڈونیشیا کے درمیان دفاعی تعلقات میں بڑھتی ہوئی رفتار اور مسلسل رابطے اور مکالمے کے ذریعے تعاون کو مزید گہرا کرنے کے مشترکہ عزم کی عکاسی ہوتی ہے۔
مزید پڑھیں: سربراہ پاک فضائیہ کی عراقی ایئر چیف سے ملاقات، مشترکہ تربیت اور دفاعی تعاون بڑھانے پر اتفاق
قبل ازیں انڈونیشیا کے وزیر دفاع نے فیلڈ مارشل سید عاصم منیر سے بھی ملاقات کی، جس میں دفاعی تعاون کو فروغ دینے پر بات چیت کی گئی۔
