قومی پیغامِ امن کمیٹی نے اعلان کیا ہے کہ آنے والا جمعہ ملک بھر میں ’پیغامِ امن‘ کے طور پر منایا جائے گا، جبکہ اس حوالے سے نمازِ جمعہ کے خطبات میں بھی امن، اتحاد اور دہشتگردی کے خلاف مؤقف اجاگر کیا جائے گا۔
اس سلسلے میں گورنر خیبرپختونخوا فیصل کریم کنڈی اور قومی پیغامِ امن کمیٹی کے علما کرام نے گورنر ہاؤس پشاور میں مشترکہ پریس کانفرنس کی۔
مزید پڑھیں: قومی بیانیے کا فروغ، قومی پیغام امن کمیٹی نے ڈی جی آئی ایس پی آر کو مکمل تعاون کی یقین دہانی کرادی
گورنر خیبرپختونخوا نے کمیٹی کے اراکین کا شکریہ ادا کرتے ہوئے کہاکہ دہشتگردی کے خلاف جنگ میں سیکیورٹی فورسز اور پولیس نے بے مثال قربانیاں دی ہیں، جبکہ عوام بھی اس عفریت سے شدید متاثر ہوئے ہیں۔ انہوں نے واضح کیا کہ پوری قوم اس جنگ میں پاک فوج کے شانہ بشانہ کھڑی ہے۔
گورنر خیبر پختونخواہ فیصل کریم کنڈی کا قومی پیغام امن کمیٹی کانفرنس سے خطاب pic.twitter.com/0SvfoORNMz
— Pakistan Peoples Party – PPP (@PPP_Org) January 14, 2026
قومی پیغامِ امن کمیٹی کے کوآرڈینیٹر علامہ طاہر اشرفی نے کہاکہ کمیٹی نے ملک گیر مہم کا آغاز پشاور سے کیا ہے کیونکہ خیبرپختونخوا دہشتگردی سے سب سے زیادہ متاثرہ صوبہ رہا ہے۔ انہوں نے بتایا کہ پشاور کے بعد دیگر شہروں کا بھی دورہ کیا جائے گا۔
علامہ طاہر اشرفی نے کہاکہ ’پیغامِ پاکستان‘ کی روشنی میں متفقہ فتویٰ پر امامِ کعبہ سمیت جید علما کے دستخط موجود ہیں اور خودکش دھماکوں کے خلاف سب سے پہلا فتویٰ بھی پاکستانی علما نے دیا تھا۔ انہوں نے واضح کیاکہ بے گناہوں کا قتل اسلام سے کوئی تعلق نہیں رکھتا اور قوم امن کی خواہاں ہے۔
انہوں نے مزید کہاکہ پیغامِ امن کا وژن واضح ہے کہ ملک کے خلاف ہونے والی ہر سازش کے مقابلے میں فوج کے ساتھ کھڑے ہوں گے۔
ان کا کہنا تھا کہ افغان طالبان کو یہ سمجھنا ہوگا کہ پاکستان کا امن ان کے اپنے امن سے جڑا ہے، جبکہ افغانستان سے ہونے والے حملوں پر سنجیدہ عملدرآمد ناگزیر ہے۔
مزید پڑھیں: قومی بیانیے کی تشکیل کے لیے پیغام امن کمیٹی قائم، کون کون شامل ہوگا؟
علامہ طاہر اشرفی نے کہاکہ آنے والا جمعہ ملک بھر میں پیغامِ امن کے طور پر منایا جائے گا اور پاکستان کی فوج اور قوم مضبوط ہیں۔ انہوں نے کہا کہ پاکستان کے مدارس اور مساجد کبھی بھی ملک کے خلاف استعمال نہیں ہوں گے۔
پریس کانفرنس میں موجود کمیٹی کے دیگر اراکین نے بھی اس عزم کا اظہار کیا کہ وہ ملک میں امن کے قیام کے لیے ہر شہر جائیں گے، پاک فوج کے ساتھ کھڑے رہیں گے اور دہشتگردی کے خلاف بھرپور آواز بلند کرتے رہیں گے۔
