گلگت بلتستان کے ضلع استور میں خانہ بدوشوں کے قافلے پر برفانی تودہ گرنے سے 10 افراد جاں بحق جبکہ 25 سے زائد زخمی ہو گئے۔ ضلعی انتظامیہ اور پولیس نے امدادی سرگرمیاں فوری شروع کر دی تھیں اور اب پاک فوج بھی وہاں پر پہنچ گئی ہے جس کے بعد 8 افراد کی میتوں کو تودے سے نکال لیا گیا ہے جبکہ 13 زخمی افراد کو اسپتال منتقل کر دیا گیا ہے۔
حادثہ استور کے شونٹر ٹاپ کے مقام پر پیش آیا ہے، جہاں 3 خانہ بدوش خاندانوں کے 10 افراد کی اموات کی تصدیق چیف سیکریٹری گلگت بلتستان نے کردی ہے۔
شونٹر پاس کے ٹاپ پر برفانی تودہ گرنے سے 9 افراد خانہ بدوش کی ہلاکت کی اطلاعات پر ڈپٹی کمشنر استور کے احکامات پر ریسکیو 1122 استور کی مارچری وین اور ایمبولینس جائے حادثہ کی طرف روانہ کر دی گئی ہے
— Abshar TV Gilgit Baltistan (@BasharatYa20502) May 27, 2023
ایس پی استور شیرین خان نے میڈیا کو بتایا کہ تودہ اس وقت گرا جب خانہ بدوش شونٹر ٹاپ پر خیموں میں موجود تھے۔ برفانی تودہ کی زد پہ تین خاندان آئے ہیں۔
شونٹر ٹاپ گلگت بلتستان کے صوبائی دارالحکومت گلگت سے تقریبا 200 کلومیٹر دور ہے جو آزاد کشمیر اور گلگت بلتستان کو ملاتا ہے۔
اب تک موصولہ کی اطلاعات کے مطابق حادثہ گزشتہ رات گئے پیش آیا ہے جب قافلہ ایک مقام پر خیمے لگا کر آرام کر رہا تھا۔ ایس پی شیرین خان کے مطابق بکر وال خانہ بدوشوں کا متاثرہ قافلہ تین گھرانوں پر مشتمل تھا، جس میں بچے اور خواتین بھی شامل ہیں ۔
’ملک کے مختلف علاقوں سے خانہ بدوش ہر سال موسم گرما میں دو سے 4 ماہ کے لئے استور آتے ہیں اور اس دوران وہ اپنے ساتھ بھیڑ بکریاں بھی لاتے ہیں اور چراہ گاہوں میں قیام پذیر ہوتے ہیں۔‘
وزیر اعلٰی گلگت بلتستان خالد خورشید نے استور میں واقع شونٹر ٹاپ پر برفانی تودہ گرنے کے حادثے پراظہار افسوس کرتے ہوئے تمام متعلقہ محکموں اور اداروں کو فوری ریسکیو آپریشن شروع کرنے کی ہدایت کی۔
وزیرِ اعلٰی خالد خورشید کی جانب سے جاری بیان میں ہدایت کی گئی ہے کہ دبے افراد کے سرچ اینڈ ریسکیو کے لیے ہر ممکنہ اقدامات کیے جائیں۔ انہوں نے جلد متاثرہ علاقے کا دورہ کرنے کا بھی کہا ہے۔
این ڈی ایم اے نے پاک فوج کو 2 ہیلی کاپٹرز فراہم کر دیے
دوسری جانب گلگت بلتستان کے علاقے استور کے قریب برفانی تودہ گرنے کے واقعہ کے بعد ’این ڈی ایم اے‘ نے پاک فوج کو 2 ہیلی کاپٹرز فراہم کر دیے ہیں جو موسم کی جانچ پڑتال کے بعد استعمال کیے جائیں گے۔
ترجمان ’این ڈی ایم اے‘ نے بتایا کہ ہم مقامی انتظامیہ، جی بی ڈی ایم اے اور ریسکیو 1122 کے ساتھ رابطے میں ہیں۔ فورس کمانڈر شمالی علاقہ جات کو ریسکیو اور ریکوی کے لیے متحرک کر دیا گیا ہے،امدادی کارروائیوں کے بعد 11 افراد زندہ نکالے جا چکے ہیں۔
این ڈی ایم اے کے مطابق اب تک ایک شخص کی لاش کو تودے سے نکالا گیا ہے۔
پاک فوج کا ریسکیو آپریشن جاری
گلگت بلتستان کی وادی شونٹر میں برفانی تودے کی زد میں آنے والے افراد کو نکالنے کے لیے پاک فوج کا ریسکیو آپریشن جاری ہے۔
پاک فوج کی امدادی اور ریسکیو ٹیموں نے سول انتظامیہ کے تعاون سے اب تک 8 جاں بحق افراد کو زیرِ برف تودہ سے نکال لیا ہے اور امدادی کاوشوں کے نتیجہ میں 13 زخمی افراد کو بحفاظت ڈی ایچ کیو ہسپتال استور پہنچا دیا گیا ہے۔
پاک فوج کا میڈیکل کنٹرول روم بھی اسی ضمن میں تیار کر لیا گیا ہے تاکہ زخمیوں کے میڈیکل اور امدادی سرگرمیوں کو تیزی سے بر وقت جاری رکھا جا سکے۔
