کراچی کے گل پلازہ میں بھڑکنے والی شدید آگ نے متعدد خاندانوں کو متاثر کردیا، واقعے کے 24 گھنٹے گزرنے کے باوجود شعلوں پر مکمل طور پر قابو نہیں پایا جا سکا۔ آتشزدگی کے باعث سینکڑوں تاجروں کا روزگار خاکستر ہو گیا اور کئی گھرانوں کے چولہے ٹھنڈے پڑ گئے۔
مزید پڑھیں: کراچی: گل پلازہ میں لگنے والی آگ دوسرے روز بھی بے قابو، 6 افراد جاں بحق، 58 لاپتا، عمارت کے 2 حصے منہدم
واقعے پر آل صدر الائنس آف مارکیٹ اینڈ مال ایسوسی ایشن نے کل یومِ سوگ منانے کا اعلان کیا ہے، جبکہ سانحے میں جاں بحق ہونے والے تاجروں کے ایصالِ ثواب کے لیے قرآن خوانی کا بھی اہتمام کیا جائے گا۔
ادھر تاجر رہنما عتیق میر نے بتایا کہ گل پلازہ کی آگ سے تاجروں کو تقریباً 3 ارب روپے کا نقصان پہنچا ہے، جہاں ہر دکان میں اوسطاً 25 سے 30 لاکھ روپے مالیت کا سامان موجود تھا۔
ان کا کہنا تھا کہ شادیوں کا سیزن اور عید قریب ہونے کے باعث نقصانات مزید سنگین ہیں، لہٰذا حکومت متاثرہ تاجروں کے لیے بولٹن مارکیٹ طرز کے امدادی پیکج کا اعلان کرے۔ انہوں نے کہاکہ شہر بھر میں کل یومِ مذمت اور یومِ سوگ بھی منایا جائے گا۔
واضح رہے کہ کراچی کے گل پلازہ میں لگنے والی آگ پر 24 گھنٹے بعد بھی قابو نہیں پایا جا سکا، واقعے میں 6 افراد جاں بحق ہوگئے ہیں، جبکہ 60 سے زیادہ لاپتا ہیں۔
مزید پڑھیں: کئی گھرانوں کے چراغ گُل کرنے والی گل پلازہ کی آگ میں متعدد افراد لاپتا، اہل خانہ پریشان
وزیراعلیٰ سندھ مراد علی شاہ نے کہا ہے کہ واقعے کی مکمل انکوائری کی جائےگی، جبکہ تاجروں کے نقصانات کا ازالہ کریں گے۔
