بصیرت اسکول آف ایکسی لینس، واہ کینٹ کے قیام کے 11 سال مکمل ہونے پر ایک شاندار اور متاثر کن تقریب کا انعقاد کیا گیا، جس میں بصارت سے محروم خصوصی بچوں نے اپنی غیر معمولی صلاحیتوں کا بھرپور مظاہرہ کیا اور حاضرین کے دل جیت لیے۔
تقریب کا آغاز تلاوتِ کلامِ پاک سے ہوا، جس کے بعد خصوصی بچوں کی جانب سے خوبصورت ٹیبلوز پیش کیے گئے۔ ان ٹیبلوز میں اعتماد، خود اعتمادی اور معاشرے میں مثبت کردار کا پیغام نمایاں تھا۔ حاضرین نے بچوں کی پرفارمنس کو دل کھول کر سراہا اور تالیاں بجا کر ان کی حوصلہ افزائی کی۔
تقریب کا سب سے یادگار لمحہ اس وقت آیا جب ایک خصوصی بچے نے طبلہ بجا کر اپنی فنکارانہ صلاحیتوں کا شاندار مظاہرہ کیا۔ طبلے کی دلکش تھاپ نے پورے ہال کو مسحور کر دیا اور حاضرین کی جانب سے بھرپور داد وصول کی۔
اس موقع پر اسکول کی پرنسپل جویریہ فیصل نے خطاب کرتے ہوئے کہا کہ بصیرت اسکول گزشتہ 11 برسوں سے بصارت سے محروم اور خصوصی بچوں کو معیاری تعلیم اور عملی تربیت فراہم کر رہا ہے تاکہ وہ خودمختار زندگی گزار سکیں۔ ان کا کہنا تھا کہ ان بچوں کی کامیابیاں ہی ادارے کی اصل پہچان ہیں۔
تقریب سے دیگر مقررین اور اساتذہ نے بھی خطاب کیا اور بچوں کی محنت، لگن اور اساتذہ کی خدمات کو سراہا۔ خصوصی بچوں کو پروگرام کی تیاری کروانے والی ٹرینر اریبہ ناز نے کہا کہ ان بچوں کے ساتھ یہ میرا پہلا تجربہ تھا، لیکن بچوں نے بھرپور انداز میں میرا ساتھ دیا اور صرف 2 ہفتوں میں ہم نے اس پروگرام کی تیاری مکمل کی۔ انہوں نے کہا کہ یہ بچے بے پناہ صلاحیتوں کے حامل ہیں اور مناسب رہنمائی ملنے پر ہر میدان میں کامیابی حاصل کر سکتے ہیں۔
تقریب کے اختتام پر ادارے کی ترقی میں نمایاں کردار ادا کرنے والے اساتذہ اور سٹاف کو سرٹیفیکیٹس دیے گئے، جبکہ بچوں کی حوصلہ افزائی کے لیے خصوصی انعامات بھی پیش کیے گئے۔ تقریب کا ماحول خوشی، امید اور حوصلے سے بھرپور رہا اور یہ دن بصیرت اسکول آف ایکسی لینس کی کامیابیوں کے سفر میں ایک یادگار سنگِ میل ثابت ہوا۔
