پاکستان اسٹاک ایکسچینج میں مثبت رجحان غالب رہا، جہاں بینچ مارک کے ایس ای 100 انڈیکس ابتدائی کاروباری اوقات میں تقریباً 700 پوائنٹس بڑھ گیا۔
صبح 9 بج کر 40 منٹ پر کے ایس ای 100 انڈیکس 188,895.12 پوائنٹس پر موجود تھا، جو 692.27 پوائنٹس یا 0.37 فیصد اضافے کو ظاہر کرتا ہے۔
آٹو موبائل اسمبلرز، کمرشل بینکس، فرٹیلائزر، تیل و گیس تلاش کرنے والی کمپنیوں اور پاور جنریشن سمیت اہم شعبوں میں خریداری کا رجحان دیکھا گیا۔
یہ بھی پڑھیں: سرمایہ کاروں کا اعتماد اسٹاک ایکسچینج میں بہتری کا باعث، کیا معیشت مستحکم ہورہی ہے؟
حبکو، ماری، او جی ڈی سی، پول، پی پی ایل، ایچ بی ایل، ایم سی بی، میزان بینک اور نیشنل بینک سمیت انڈیکس پر زیادہ اثر رکھنے والے حشیئرز سبز زون میں ٹریڈ ہوتے رہے۔
ایک اہم پیش رفت میں یہ بات سامنے آئی کہ جولائی تا دسمبر 26-2025 کے دوران پاکستان میں غیر ملکی سرمایہ کاری نمایاں طور پر کم ہو کر 207 ملین ڈالر رہ گئی، جبکہ ایک سال قبل اسی مدت میں یہ سرمایہ کاری 1.343 بلین ڈالر تھی۔
گزشتہ روز یعنی منگل کو محتاط کاروبار کے باعث پاکستان اسٹاک ایکسچینج معمولی مندی کا شکار رہی، کیونکہ اسٹیٹ بینک نے اچانک پالیسی فیصلہ کرتے ہوئے شرح سود برقرار رکھنے کا اعلان کردیا تھا۔
کے ایس ای 100 انڈیکس 384.80 پوائنٹس یعنی 0.20 فیصد کمی کے بعد 188,202.86 پوائنٹس پر بند ہوا تھا۔
عالمی سطح پر، منگل کے روز عالمی اسٹاک مارکیٹس میں مسلسل پانچویں سیشن کے دوران تیزی دیکھی گئی اور امریکی کمپنیوں کے مالی نتائج کے سیزن میں تیزی آنے کے باعث انٹرا ڈے ریکارڈ قائم ہوا۔
مزید پڑھیں: معاشی اشاریے مضبوط، پاکستان اسٹاک ایکسچینج نے تاریخ کی نئی بلندی چھو لی
اسی دوران، فیڈرل ریزرو کے پالیسی اعلان سے قبل ڈالر تقریباً 4 سال کی کم ترین سطح پر آ گیا۔
وال اسٹریٹ میں ایس اینڈ پی 500 اور نیسڈیک میں اضافہ ہوا، جبکہ ایس اینڈ پی 500 انڈیکس نے ری کارڈ سطح پر اختتام کیا۔
سرمایہ کار بوئنگ اور یونائیٹڈ پارسل سروس سمیت بڑی کمپنیوں کے مالی نتائج کا جائزہ لیتے رہے، جہاں یو پی ایس نے رواں سال آپریشنل شعبوں میں 30 ہزار تک ملازمتیں ختم کرنے کا اعلان کیا۔
ڈاؤ جونز انڈسٹریل ایوریج پر دباؤ رہا، جس کی وجہ بوئنگ کے حصص میں 1.6 فیصد کمی اور یونائیٹڈ ہیلتھ کے شیئرز میں تقریباً 20 فیصد گراوٹ بنی، کمپنی نے 2026 میں آمدن میں کمی کی پیش گوئی کی ہے۔
مزید پڑھیں: مثبت خبروں نے اسٹاک مارکیٹ سنبھال لی، انڈیکس میں 5,200 پوائنٹس کا اضافہ
ایم ایس سی آئی کے عالمی اسٹاک انڈیکس میں 8.92 پوائنٹس یا 0.85 فیصد اضافہ ہوا اور یہ 1,053.09 پوائنٹس پر پہنچ گیا، جو رواں سال کا طویل ترین مسلسل 5 روزہ اضافہ ہے۔
انڈیکس نے کاروبار کے دوران 1,053.88 پوائنٹس کی ریکارڈ سطح بھی چھولی۔
