اسلام آباد پولیس نے رات گئے عوامی مسلم لیگ کے سربراہ شیخ رشید کو بحریہ ٹاؤن میں ان کی رہائش گاہ سے گرفتار کرکے تھانہ سیکریٹریٹ منتقل کردیا ہے۔
سابق وزیر داخلہ شیخ رشید کو اسلام آباد کے تھانہ آبپارہ میں پیپلز پارٹی راولپنڈی کے نائب صدر راجہ عنایت کی مدعیت میں یکم فروری کو درج ہونیوالی ایف آئی آر پر گرفتار کیا گیا ہے۔
راجہ عنایت کی جانب درج ایف آئی آر میں کہا گیا ہے کہ شیخ رشید نے اپنے انٹرویو میں آصف زرداری پر عمران خان کو قتل کرانے کی سازش کا الزام لگایا۔ شیخ رشید نے ایک سازش کے تحت آصف زرداری پر الزام عائد کرکے سابق صدر اور انکے خاندان کو مستقل خطرے سے دوچارکردیا ہے۔ الزام کے ذریعے سازش کرنے پر شیخ رشید سمیت دیگر کے خلاف قانونی کاروائی کی جائے۔
تھانے کے باہر میڈیا سے گفتگو میں شیخ رشید نے بتایا کہ پولیس نے انکے گھر کے دروازے کھڑکیاں توڑ کر سو دو سو مسلح لوگ داخل ہوئے۔ بچوں اور ملازموں کو مارا اور زبردستی مجھے اٹھا کر لائے ہیں۔ یہ تھانہ ظلم کا نشان ہے، انشاء اللہ حق کی فتح ہو گی۔ عمران خان کے ساتھ ہیں۔
شیخ رشید کے بھتیجے شیخ راشد شفیق کا کہنا تھا کہ اسلام آباد پولیس نے شیخ رشید کو جس ایف آئی آر پر گرفتار کیا اس پر ہم پہلے ہی عدالت سے رجوع کرچکے تھے لہٰذا اب ہم اس پر توہینِ عدالت کی درخواست کریں گے۔
