وزیراعلیٰ پنجاب مریم نواز شریف نے بلوچستان میں فتنہ الہندوستان کے دہشتگردوں کے بزدلانہ حملوں کی شدید مذمت کرتے ہوئے کہا ہے کہ سیکیورٹی فورسز نے ان حملوں کو دلیری سے پسپا کیا، جس پر وہ فورسز کو خراجِ تحسین پیش کرتی ہیں۔
اپنے ایک بیان میں مریم نواز نے کہاکہ بلوچستان پاکستان ہے اور پاکستان بلوچستان ہے، اور ہر پاکستانی بلوچستان اور اس کے عوام سے بے انتہا محبت کرتا ہے۔
مزید پڑھیں: نیشنل ایکشن پلان پر اتفاق رائے موجود، دہشتگردی کے معاملے پر سیاسی الزام تراشی بند ہونی چاہیے، طلال چوہدری
انہوں نے واضح کیا کہ بلوچستان کے چپے چپے کی حفاظت کی جائے گی اور بلوچستان پر اٹھنے والی ہر انگلی کاٹ دی جائے گی، ہر آنکھ نکال لی جائے گی۔
وزیراعلیٰ پنجاب نے کہاکہ دہشتگرد جان لیں کہ خون کی ایک ایک بوند کا بدلہ لیا جائے گا۔
ان کا کہنا تھا کہ پوری قوم پرعزم ہے اور دہشتگردی کو شکست دے کر دم لے گی۔ دشمن کے ہاتھوں میں کھیلنے والے دہشتگرد کسی رعایت کے مستحق نہیں۔
مریم نواز نے کہا کہ فتنہ الہندوستان کے دہشتگرد جہنم کا ایندھن ہیں اور ان دہشتگردوں کا نہ دین سے کوئی تعلق ہے اور نہ بلوچ قومیت سے، یہ محض غدار ہیں۔
انہوں نے کہاکہ پنجاب سمیت پورے پاکستان کے عوام بلوچستان کے محب وطن عوام کے ساتھ کھڑے ہیں اور انہیں مکمل تعاون فراہم کریں گے۔
انہوں نے کہاکہ قرآن و سنت میں ملک و قوم کے ساتھ بغاوت کرنے والوں کو سخت ناپسند کیا گیا ہے۔
مریم نواز نے سوال اٹھایا کہ بے گناہ عوام، عورتوں اور بچوں پر حملہ کرنے والا کیا مسلمان ہو سکتا ہے؟ انہوں نے کہاکہ حضرت محمد ﷺ نے جنگ کے دوران بھی عورتوں، بچوں اور بے گناہ لوگوں پر حملے سے منع فرمایا ہے۔
مزید پڑھیں: دہشت گرد بلوچوں کو ایندھن بنا رہے ہیں، پاکستان کا ایک انچ نہیں لے سکتے، وزیراعلیٰ سرفراز بگٹی
وزیراعلیٰ پنجاب نے کہاکہ اللہ اور اس کے رسول ﷺ کی تعلیمات کی کھلم کھلا نفی کرنے والے مسلمان نہیں کہلا سکتے۔ فتنہ الہندوستان کے پروردہ دہشتگرد جہنمی ہیں اور ان کے لیے دنیا اور آخرت میں بربادی یقینی ہے۔
