وزیراعلیٰ بلوچستان سرفراز بگٹی نے کہا ہے کہ بلوچستان میں دہشتگردی کی وجہ لوگوں کی محرومی نہیں، جبکہ لاپتا افراد کا معاملہ تشدد کو جسٹیفائی کرنے کے لیے استعمال کیا جاتا ہے۔
نجی ٹی وی سے گفتگو کرتے ہوئے انہوں نے کہا کہ دہشتگرد جب بھی شہروں میں کارروائی کرتے ہیں تو انسانوں کو ڈھال بنا لیتے ہیں۔
مزید پڑھیں: بلوچستان کی طرف اٹھنے والی ہر آنکھ نکال لی جائےگی، وزیراعلیٰ پنجاب مریم نواز
انہوں نے بتایا کہ نوشکی میں کومبنگ آپریشن اب بھی جاری ہے، جبکہ دیگر شہروں میں آپریشن ختم ہو چکا ہے۔
وزیراعلیٰ نے کہا کہ بلوچستان میں دہشتگردوں کی تعداد 4 سے 5 ہزار سے زیادہ نہیں ہوگی، ہمارے آپریشن کی وجہ سے حالیہ دہشتگرد حملوں کی شدت کم رہی ہے۔
انہوں نے کہا کہ دہشتگردی کے واقعات میں مصالحتی پالیسی کی وجہ سے اضافہ ہوا اور 2018 سے پہلے ریاست کی پالیسی مصالحت کی نہیں تھی۔
سرفراز بگٹی نے بین الاقوامی میڈیا سے درخواست کی کہ دہشتگردوں کو دہشتگرد کہیں۔ انہوں نے کہا کہ نیشنل ایکشن پلان پر سیاسی و عسکری قیادت میں اتفاق رائے تھا۔
انہوں نے بتایا کہ 31 سویلین اور 17 سیکیورٹی اہلکار شہید ہوئے، دہشتگردوں کی تعداد زیادہ سے زیادہ 200 بھی نہیں تھی۔
وزیراعلیٰ نے کہاکہ اگر یہ سیاسی مسئلہ ہوتا تو بات چیت سے حل ہو جاتا، لیکن یہ معاملہ سیاسی نہیں ہے، اسے سمجھنے کی ضرورت ہے۔
انہوں نے مزید کہا کہ آئین پاکستان کے بعد سب سے بڑی دستاویز نیشنل ایکشن پلان ہے۔
مزید پڑھیں: کوئٹہ: بلوچستان بھر میں دفعہ 144 نافذ، ایک ماہ کے لیے سخت پابندیاں عائد
سرفراز بگٹی نے کہا کہ لاپتا افراد کا معاملہ تشدد کو جسٹیفائی کرنے کے لیے استعمال ہوتا ہے، یہ مسئلہ صرف بلوچستان تک محدود نہیں، خیبرپختونخوا میں بھی لاپتا افراد کا مسئلہ ہے، لیکن شور زیادہ بلوچستان میں مچایا جاتا ہے۔
وزیراعلیٰ کا مزید کہنا تھا کہ بلوچستان میں دہشتگردوں کو 2 سے 3 فیصد سے زیادہ عوام کی حمایت حاصل نہیں۔
