امریکی صدر ڈونلڈ ٹرمپ نے گریمی ایوارڈز 2026 کے میزبان ٹریور نوح کے خلاف قانونی کارروائی کی دھمکی دے دی۔
یہ بھی پڑھیں: گریمیز 2025: البم آف دی ایئر کا ایوارڈ کس کے حصے آیا؟
یہ تنازع اس وقت کھڑا ہوا جب ٹریور نوح نے ایوارڈ شو کے دوران جیفری ایپسٹین سے متعلق ایک مذاق میں ٹرمپ کا حوالہ دیا۔
یہ معاملہ اس وقت سامنے آیا جب ٹریور نوح نے گلوکارہ بلی آئیلش کو ان کے گانے وائلڈ فلاور پر ’سونگ آف دی ایئر‘ کا گریمی ایوارڈ جیتنے پر مبارکباد دی۔
اس موقعے پر ٹریور نوح نے طنزیہ انداز میں کہا کہ یہ وہ گریمی ہے جس کی ہر فنکار خواہش رکھتا ہے، تقریباً اتنی ہی جتنی ٹرمپ کو گرین لینڈ کی خواہش ہے جس سے انہوں نے صدر ٹرمپ کی جانب سے گرین لینڈ کو ضم کرنے کے بیانات کی طرف اشارہ کیا۔
ٹریور نوح نے مزید کہا کہ چونکہ ایپسٹین اب موجود نہیں اس لیے انہیں (ٹرمپ کو) بل کلنٹن کے ساتھ گھومنے کے لیے ایک نئے جزیرے کی ضرورت ہے۔ اس بیان پر صدر ٹرمپ سخت برہم ہو گئے۔
مزید پڑھیے: ایپسٹین فائلز کی مزید کھیپ جاری: یہ کونسی معلومات ہیں، اہم شخصیات کے اوسان کیوں خطا ہیں؟
ٹرمپ نے سوشل میڈیا پلیٹ فارم ’ٹروتھ سوشل‘ پر ردعمل دیتے ہوئے لکھا کہ گریمی ایوارڈز بدترین اور ناقابل دید پروگرام ہیں۔
انہوں نے ٹریور نوح کو ناقص، قابلِ رحم، بے صلاحیت اور جمی کمیل جتنا برا میزبان قرار دیا۔
صدر ٹرمپ نے وضاحت کرتے ہوئے کہا کہ میں بل کلنٹن کی طرف سے تو بات نہیں کر سکتا لیکن میں کبھی ایپسٹین کے جزیرے یا اس کے آس پاس بھی نہیں گیا اور آج رات کے جھوٹے اور ہتک آمیز بیان سے پہلے مجھ پر کبھی ایسا الزام نہیں لگا حتیٰ کہ فیک نیوز میڈیا نے بھی نہیں۔
قانونی کارروائی کے حوالے سے ٹرمپ نے کہا کہ وہ اپنے وکلا کو ٹریور نوح کے خلاف مقدمہ دائر کرنے کی ہدایت دینے پر غور کر رہے ہیں اور بھاری ہرجانے کا دعویٰ کیا جائے گا۔
مزید پڑھیں: ٹرمپ ایپسٹین کی جنسی اسمگلنگ میں شریک تھے یا نہیں، کچا چٹھا کھلنے کو تیار
ایپسٹین سے متعلق تنازع اس وقت مزید شدت اختیار کر گیا جب امریکی محکمہ انصاف کی جانب سے جمعے کے روز 30 لاکھ سے زائد دستاویزات جاری کی گئیں۔ تازہ دستاویزات میں ڈونلڈ ٹرمپ، بل گیٹس اور ایلون مسک سمیت کئی بااثر شخصیات سے متعلق چونکا دینے والے دعوے سامنے آئے ہیں۔
