وزیراعظم پاکستان کے مشیر برائے سیاسی امور رانا ثنااللہ نے کہا ہے کہ وزیراعلیٰ خیبرپختونخوا سہیل آفریدی نے وزیراعظم کے ساتھ میٹنگ میں دہشتگردی کے خلاف آپریشن رکوانے سے متعلق کوئی بات نہیں کی، بلکہ دہشتگردی کے خلاف بھرپور کردار ادا کرنے کی یقین دہانی کرائی۔
نجی ٹی وی سے گفتگو کرتے ہوئے انہوں نے کہاکہ آج کی میٹنگ میں ماحول خوشگوار تھا، وزیراعلیٰ نے بات چیت میں وزیراعظم صاحب کہہ کر مخاطب کیا۔
مزید پڑھیں: وزیراعظم شہباز شریف سے وزیراعلیٰ خیبرپختونخوا سہیل آفریدی کی پہلی اہم ملاقات، کیا کچھ زیر بحث آیا؟
انہوں نے کہاکہ وزیراعظم نے گرمجوشی سے وزیراعلیٰ سہیل آفریدی کا خیرمقدم کیا، اور یاد دلایا کہ مبارکباد دی تھی اور میٹنگز میں آنے کا کہا تھا۔
رانا ثنااللہ کے مطابق وزیراعلیٰ خیبرپختونخوا نے کہاکہ آئندہ تمام میٹنگز میں شرکت کروں گا۔ وزیراعلیٰ نے یقین دہانی کرائی کہ دہشتگردی کے خلاف بھرپور کردار ادا کریں گے۔
انہوں نے کہاکہ وزیراعلیٰ سہیل آفریدی نے آپریشن رکوانے سے متعلق کوئی بات نہیں کی۔
رانا ثنااللہ کے مطابق وزیراعظم نے امن و امان، دہشتگردی اور سی ٹی ڈی پر بات کی، جبکہ سی ٹی ڈی پنجاب کا حوالہ بھی دیا۔
مشیر وزیراعظم کے مطابق شہباز شریف نے سہیل آفریدی کو یاد دلایا کہ حلف اٹھانے کے بھی کوئی آئینی و قانونی تقاضے ہوتے ہیں۔ جس پر وزیراعلیٰ نے دہشتگردی کے خلاف اپنے مکمل عزم کا اظہار کیا۔
مزید پڑھیں: کیا محمود اچکزئی حکومت اور پی ٹی آئی کے درمیان مذاکرات کروا پائیں گے؟
رانا ثنااللہ کے مطابق وزیراعظم نے سہیل آفریدی کو مخاطب کرتے ہوئے کہاکہ آپ کا کوئی بھی حق روکنے کے حق میں نہیں ہوں، آپ کا جو حق بنتا ہے اس سے بڑھ کر دیں گے۔
