پاکستان سپر لیگ کی فرنچائز ملتان سلطانز کی نیلامی کی تاریخ کا اعلان کردیا گیا ہے۔
پی ایس ایل کے سوشل میڈیا اکاؤنٹس کے ذریعے تصدیق کی گئی ہے کہ ملتان سلطانز کی نیلامی 9 فروری کو لاہور میں ہوگی، یہ فرنچائز پی ایس ایل 2021 کی چیمپیئن ٹیم رہی ہے۔
یہ بھی پڑھیں: پی ایس ایل ملتان فرنچائز کے لیے آخری موقع، نیا دور شروع ہونے والا ہے، محسن نقوی
اس سے 2 روز قبل پاکستان کرکٹ بورڈ نے تکنیکی جانچ پڑتال کے عمل کی تکمیل کے بعد فرنچائز کے حصول کے لیے شارٹ لسٹ کیے گئے 5 بولی دہندگان کے نام جاری کیے تھے۔
پاکستان کرکٹ بورڈ نے 14 جنوری 2025 کو باضابطہ طور پر ملتان سلطانز کی ملکیت کے حقوق فروخت کرنے کے عمل کا آغاز کیا تھا اور دلچسپی رکھنے والی کمپنیوں اور افراد سے بولیاں طلب کی تھیں۔
یہ عمل ملتان سلطانز کے سابق مالک علی ترین کی جانب سے فرنچائز سے علیحدگی کے اعلان کے بعد شروع ہوا، علی ترین نے پی سی بی کے ساتھ طویل عرصے سے جاری اختلافات کو علیحدگی کی وجہ قرار دیا تھا۔
یہ بھی پڑھیں: پاکستان سپر لیگ 11: جیسن گلیسپی حیدرآباد فرنچائز کے ہیڈ کوچ مقرر
بعد ازاں چیئرمین پی سی بی محسن نقوی نے اعلان کیا تھا کہ موجودہ معاہدہ 31 دسمبر 2025 کو ختم ہونے کے بعد بورڈ فرنچائز کا کنٹرول سنبھال لے گا، ابتدائی طور پر منصوبہ تھا کہ پی سی بی ایک سال تک ٹیم خود چلائے گا اور پھر 2027 میں نیلامی کی جائے گی۔
بعد ازاں پی سی بی نے دیگر فرنچائز نیلامیوں میں حاصل ہونے والی بلند بولیوں کے بعد ملتان سلطانز کی فروخت جلد کرنے کا فیصلہ کیا۔
گزشتہ ماہ جناح کنونشن سینٹر میں ہونے والی تاریخی نیلامی میں ایف کے ایس گروپ اور او زیڈ ڈیولپرز نے حیدرآباد اور سیالکوٹ کی نئی فرنچائزز بالترتیب 1.75 ارب روپے اور 1.85 ارب روپے میں حاصل کی تھیں، جس کے بعد پی ایس ایل ٹیموں کی تعداد 8 ہو گئی۔
یہ بھی پڑھیں: انتظار ختم، پی ایس ایل کی نئی فرنچائز سیالکوٹ کا مکمل نام سامنے آگیا
واضح رہے کہ پی ایس ایل 11 کا آغاز 26 مارچ سے ہوگا۔
