متحدہ عرب امارات کے سالم محمد سالم البواب الزیبی نے اعلان کیا ہے کہ پاکستانی شہریوں کے لیے لیبر ویزے جلد بحال کیے جائیں گے، اس کے لیے تیاریاں جاری ہیں۔
یہ بیان انہوں نے پاکستان اوورسیز ایمپلائمنٹ پروموٹرز ایسوسی ایشن( پوئپا) کے ایک وفد سے ملاقات کے دوران دیا، جس کی قیادت پوئپا چیئرمین سید رحمت علی شاہ کررہے تھے۔
یہ بھی پڑھیں: گزشتہ ڈیڑھ سال میں کتنے پاکستانیوں کو یو اے ای کے ورک ویزے جاری ہوئے؟
وفد میں پوئپا کے سیکریٹری جنرل منیر صدیق، سابق چیئرمین سید حبیب علی شاہ، چیئرمین کے اسپیشل اسسٹنٹ شکیل عباسی اور ایگزیکٹو ممبر طارق جاوید بھی شامل تھے۔
ملاقات میں پاکستانی مزدوروں کے یو اے ای میں روزگار سے متعلق مختلف امور پر تبادلہ خیال کیا گیا۔
سفیر الزیبی نے تصدیق کی کہ پاکستانیوں کے لیے ورک ویزوں کے اجرا کے اقدامات جاری ہیں اور جلد اس میں پیشرفت متوقع ہے، جس سے پاکستانیوں کے لیے مزید روزگار کے مواقع پیدا ہوں گے۔
انہوں نے کہا کہ پاکستان اور یو اے ای کے درمیان تعاون مختلف شعبوں میں جاری ہے، جس میں ماہر افرادی قوت کی فراہمی بھی شامل ہے۔
یہ بھی پڑھیں: یو اے ای ویزے پر پابندی، قائمہ کمیٹی برائے سمندر پار پاکستانیز نے اہم ہدایات جاری کردیں
انہوں نے پاکستانی مزدوروں کے یو اے ای کی ترقی میں کردار کی تعریف کی اور کہا کہ ان کی مہارت اور پیشہ ورانہ صلاحیتیں ملکی معیشت کے قیام میں اہم کردار ادا کر رہی ہیں۔
پوئپا کے چیئرمین سید رحمت علی شاہ نے سفیر کے سفارتی اقدامات کو سراہا اور دوبارہ اس بات پر زور دیا کہ یو اے ای کی تعمیراتی اور ترقیاتی صنعت میں پاکستانی مزدوروں کی اہمیت برقرار ہے۔
