پاکستان اسپیس اینڈ اپر ایٹماسفیئر ریسرچ کمیشن (اسپارکو) نے پاکستان کے ہیومن اسپیس فلائٹ پروگرام میں ایک اور اہم سنگِ میل عبور کرتے ہوئے خلاباز امیدواروں کے انتخاب کا ثانوی مرحلہ کامیابی سے مکمل کر لیا ہے۔
آئی ایس پی آر کے مطابق ابتدائی اسکریننگ پاکستان میں مکمل ہونے کے بعد 2 امیدواروں کو شارٹ لسٹ کیا گیا، جنہوں نے چین کے ایسٹروناٹس سینٹر (ACC) میں بین الاقوامی انسانی خلائی پرواز کے معیار کے مطابق طبی، نفسیاتی اور صلاحیتی ٹیسٹ کامیابی سے مکمل کیے۔
6 ماہ کی جدید تربیت
شارٹ لسٹ ہونے والے دونوں امیدوار چین کے ایسٹروناٹس سینٹر میں 6 ماہ کی جدید خلاباز تربیت حاصل کریں گے۔ تربیت مکمل ہونے کے بعد ایک امیدوار کو چینی اسپیس اسٹیشن (CSS) پر خلائی مشن کے لیے منتخب کیا جائے گا، جو اکتوبر یا نومبر 2026 میں متوقع ہے۔
یہ بھی پڑھیے پاکستان کا خلائی میدان میں بڑا قدم، جدید ریموٹ سینسنگ سیٹلائٹ چین سے لانچ
پاک چین خلاباز تعاون معاہدہ
یہ پیشرفت فروری 2025 میں طے پانے والے پاک چین ’ایسٹروناٹ کوآپریشن ایگریمنٹ‘ کے تحت عمل میں آئی، جس پر وزیرِاعظم پاکستان کی قیادت اور وژن میں دستخط کیے گئے تھے۔ بیان کے مطابق وزیرِاعظم کی بھرپور سرپرستی اور حمایت نے پاکستان کو انسانی خلائی پرواز کے اس تاریخی پروگرام کا حصہ بنانے میں کلیدی کردار ادا کیا۔
چین کی خصوصی حمایت
آئی ایس پی آر کے مطابق یہ منصوبہ چین کی حکومت کی مضبوط حمایت کا بھی عکاس ہے، جس نے پاکستان کو اپنے خلاباز پروگرام میں پہلا غیر ملکی شراکت دار منتخب کیا۔
