وزیراعظم کے معاون خصوصی عطا تارڑ نے کہا ہے کہ نواز شریف جلد پاکستان آئیں گے اور وہ آئندہ انتخابات میں ن لیگ کی انتخابی مہم کی قیادت کریں گے۔
پشاور میں میڈیا سے گفتگو کرتے ہوئے عطا تارڑ کا کہنا تھا کہ جس کے دل میں پاکستان کی محبت ہوگی اسے اب فیصلہ کرنا ہے کہ وہ کہاں کھڑا ہے۔ 9 مئی اور 28 مئی کا آپس میں مقابلہ ہے مگر فتح 28 مئی کی ہوگی۔
یہ بھی پڑھیں نواز شریف نے عمران خان کے ساتھ مذاکرات کو خارج از امکان قرار دے دیا
انہوں نے کہا کہ عمران خان کی گرفتاری 190 ملین پاؤنڈ کے کرپشن کیس میں ہوئی اور اس کے رد عمل میں جناح ہاؤس کو جلا دیا گیا۔ اعلیٰ عدلیہ نے قانون سے بالا تر ہو کر فیصلے دیے جو نہیں ہونا چاہیے تھا۔ یکطرفہ فیصلے اب مزید نہیں چلیں گے۔
عطا تارڑ کا کہنا تھا کہ ہم نے اپنے دور میں طلبا کو لیپ ٹاپ دیے جبکہ عمران خان نے حکومت میں آکر لنگر خانے بنائے۔
انہوں نے کہا کہ مبینہ آڈیوز سے ثابت ہوتا ہے کہ عدلیہ کے فیصلوں میں شفافیت نہیں ہے۔ کرپشن کیسز میں تھوک کے حساب سے ضمانتیں دی گئیں جو نہیں ہونا چاہیے تھا۔
عطا تارڑ نے تحریک انصاف پر تنقید کرتے ہوئے کہا کہ ان کے رہنماؤں کو جیلوں میں گرمی لگتی ہے۔