جنوبی کوریا کی معروف کرپٹو کرنسی ایکسچینج بیتھمب نے ہفتے کے روز ایک سنگین تکنیکی غلطی پر معذرت کرتے ہوئے انکشاف کیا ہے کہ پلیٹ فارم نے غلطی سے 40 ارب ڈالر سے زائد مالیت کے بٹ کوائن صارفین کو منتقل کر دیے، جس کے باعث عارضی طور پر مارکیٹ میں شدید اتار چڑھاؤ دیکھنے میں آیا۔
کمپنی کے مطابق جمعے کو پیش آنے والے واقعے میں غلطی سے 6 لاکھ 20 ہزار بٹ کوائنز صارفین کو بھیج دیے گئے، جن کی موجودہ مالیت 40 ارب ڈالر سے زائد بنتی ہے۔ واقعے کے 35 منٹ کے اندر 695 متاثرہ صارفین کے ٹریڈنگ اور نکالنے کے عمل کو معطل کر دیا گیا۔
یہ بھی پڑھیے: کرپٹو مارکیٹ میں شدید مندی، بٹ کوائن کی قیمت 16 ماہ کی کم ترین سطح پر
مقامی میڈیا رپورٹس کے مطابق بیتھمب ہر صارف کو ایک پروموشنل اسکیم کے تحت تقریباً 2 ہزار جنوبی کوریائی وون (تقریباً 1.37 ڈالر) منتقل کرنا چاہتا تھا، تاہم تکنیکی خرابی کے باعث ہر صارف کو تقریباً 2 ہزار بٹ کوائن منتقل ہو گئے۔
بیتھمب نے اپنے بیان میں کہا کہ پروموشنل ایونٹ کے دوران تقسیم کے عمل میں پیدا ہونے والی الجھن پر وہ صارفین سے مخلصانہ معذرت خواہ ہے۔ کمپنی کا کہنا ہے کہ غلطی سے منتقل کیے گئے 99.7 فیصد بٹ کوائن واپس حاصل کر لیے گئے ہیں، جبکہ باقی نقصان کی مکمل تلافی کمپنی اپنے وسائل سے کرے گی۔
بیتھمب نے تسلیم کیا کہ اس واقعے کے باعث پلیٹ فارم پر بٹ کوائن کی قیمتوں میں وقتی طور پر ‘شدید اتار چڑھاؤ’ آیا، کیونکہ کچھ صارفین نے موصول ہونے والے ٹوکن فوری طور پر فروخت کر دیے۔ کمپنی کے مطابق صورتحال کو پانچ منٹ کے اندر قابو میں کر لیا گیا۔
یہ بھی پڑھیے: بٹ کوائن یا گولڈ: موجودہ وقت میں سرمایہ کاری کے لیے بہترین آپشن کیا ہے؟
پلیٹ فارم کے چارٹس کے مطابق جمعے کی شب بٹ کوائن کی قیمت میں عارضی طور پر 17 فیصد کمی دیکھی گئی اور قیمت 8 کروڑ 11 لاکھ وون تک گر گئی۔ ہفتے کے روز جاری ایک علیحدہ بیان میں بیتھمب نے کہا کہ قیمتوں میں اچانک کمی کے باعث کچھ صارفین کے سودے ناموافق نرخوں پر طے ہوئے، جن میں ‘گھبراہٹ میں فروخت’ بھی شامل تھی۔ کمپنی نے اعلان کیا کہ متاثرہ صارفین کو مکمل قیمت کے فرق کے ساتھ اضافی 10 فیصد بونس بھی ادا کیا جائے گا۔
کمپنی کے مطابق اس واقعے سے تقریباً ایک ارب وون کا نقصان ہوا ہے۔ بیتھمب نے واضح کیا کہ یہ واقعہ کسی بیرونی ہیکنگ یا سیکیورٹی خلاف ورزی کا نتیجہ نہیں تھا بلکہ اندرونی تکنیکی غلطی کے باعث پیش آیا۔
دوسری جانب دنیا کی سب سے بڑی کرپٹو کرنسی بٹ کوائن اس ہفتے عالمی سطح پر بھی دباؤ کا شکار رہی اور نومبر 2024 میں امریکی صدر ڈونلڈ ٹرمپ کی انتخابی کامیابی کے بعد ہونے والے اضافے کے بیشتر فوائد کھو بیٹھی۔
