واٹس ایپ جلد اپنے ویب ورژن میں وائس اور ویڈیو کالنگ کی سہولت متعارف کرانے جا رہا ہے، جس کے بعد صارفین کسی اضافی سافٹ ویئر کو ڈاؤن لوڈ کیے بغیر براہ راست براؤزر کے ذریعے کالز کر سکیں گے۔
یہ بھی پڑھیں: واٹس ایپ کو اے آئی حریفوں کو رسائی نہ دینا مہنگا پڑگیا، یورپی یونین حرکت میں آگئی
ٹیکنالوجی ویب سائٹ کے مطابق واٹس ایپ ویب اب تک صرف چیٹنگ تک محدود تھا، تاہم نئی اپ ڈیٹ کے بعد صارفین وائس اور ویڈیو کالز بھی کر سکیں گے۔ اس فیچر کے ذریعے ونڈوز، میک اور لینکس استعمال کرنے والے صارفین واٹس ایپ ویب کو تقریباً اسی طرح استعمال کرسکیں گے جیسے وہ ڈیسک ٹاپ ایپ استعمال کرتے ہیں۔
رپورٹ کے مطابق واٹس ایپ ویب پر ویڈیو کالنگ کے دوران اسکرین شیئرنگ کی سہولت بھی دستیاب ہوگی۔ اگرچہ یہ فیچر گوگل میٹ یا زوم جیسے پلیٹ فارمز کا مکمل متبادل نہیں ہوگا، تاہم صارفین کے لیے ایک اہم اضافہ ضرور ثابت ہوگا۔
یہ بھی پڑھیں: واٹس ایپ صارفین ہیکرز کے شدید خطرے میں، فوری بچاؤ کیسے کریں؟
واٹس ایپ ویب پر کی جانے والی کالز بھی اینڈ ٹو اینڈ انکرپشن کے تحت ہوں گی، یعنی کال میں شریک افراد کے علاوہ کوئی اور شخص، حتیٰ کہ واٹس ایپ خود بھی ان کالز تک رسائی حاصل نہیں کر سکے گا۔ اس کے لیے صارفین کو کسی اضافی سیٹنگ کی ضرورت نہیں ہوگی، کیونکہ یہ سیکیورٹی خودکار طور پر فعال ہوگی۔
یہ فیچر خاص طور پر لینکس صارفین کے لیے فائدہ مند ثابت ہوگا، کیونکہ واٹس ایپ کی جانب سے لینکس کے لیے تاحال کوئی آفیشل ڈیسک ٹاپ ایپ فراہم نہیں کی گئی۔
یہ بھی پڑھیں: واٹس ایپ میں انسٹاگرام کی طرح ’کلوز فرینڈز‘ فیچر متعارف کرانے کی تیاری
فی الحال یہ سہولت تیاری کے مرحلے میں ہے اور کمپنی اس بات کو یقینی بنا رہی ہے کہ صارفین کو بغیر کسی خرابی کے بہتر تجربہ فراہم کیا جا سکے۔
