پاکستان اورسعودی عرب کا سیکیورٹی و انسدادِ دہشت گردی تعاون بڑھانے پر اتفاق

پاکستان اور سعودی عرب نے سیکیورٹی اور انسدادِ دہشت گردی کے شعبوں میں تعاون کو مزید مضبوط بنانے پر اتفاق کیا ہے۔

یہ پیش رفت اس وقت سامنے آئی جب پاکستان کے وزیر مملکت برائے داخلہ طلال چوہدری نے ریاض میں سعودی نائب وزیر داخلہ عبدالعزیز بن محمد بن عیاف سے ملاقات کی۔

یہ بھی پڑھیں: پاکستان سعودی عرب باہمی دفاعی معاہدے پر دستخط کیا معنی رکھتے ہیں؟

سرکاری اعلامیے کے مطابق دونوں ممالک کے درمیان دفاعی اور سیکیورٹی تعلقات میں مسلسل بہتری آ رہی ہے۔

گزشتہ سال پاکستان اور سعودی عرب کے درمیان دوطرفہ دفاعی معاہدہ طے پایا تھا جس کے تحت طویل عرصے سے جاری عسکری تعاون کو باضابطہ سیکیورٹی شراکت داری میں تبدیل کیا گیا۔

Honoured to hold a bilateral meeting with HRH Prince Dr. Abdulaziz bin Mohammed bin Ayyaf, Deputy Minister of Interior of Saudi Arabia, on the sidelines of #WDS2026 in Riyadh. Conveyed greetings & Ramadan best wishes from @CMShehbaz Prime Minister of Pakistan, along with… pic.twitter.com/YumghhgqXj

— Senator Tallal Chaudry (@TallalPMLN) February 10, 2026

اس معاہدے کے مطابق کسی ایک ملک کے خلاف جارحیت کو دونوں کے خلاف خطرہ تصور کیا جائے گا۔

ملاقات کے بعد جاری بیان میں طلال چوہدری نے کہا کہ پاکستان اور سعودی عرب کے درمیان مسلسل رابطہ خطے میں امن و استحکام کے لیے ناگزیر ہے۔

اعلامیے میں یہ بھی بتایا گیا کہ دونوں فریقین نے سیکیورٹی اور انسدادِ دہشت گردی کے تعاون کو مزید وسعت دینے پر اتفاق کیا۔

وزیر مملکت نے اپنے دورۂ ریاض کے دوران ورلڈ ڈیفنس شو 2026 میں بھی پاکستان کی نمائندگی کی۔

یہ ایک اہم بین الاقوامی دفاعی نمائش ہے جس میں مختلف ممالک کی حکومتیں، مسلح افواج اور عالمی دفاعی سازوسامان تیار کرنے والی کمپنیاں شریک ہوتی ہیں۔

دورے کے موقع پر طلال چوہدری نے وزیر اعظم شہباز شریف اور وفاقی وزیر داخلہ محسن نقوی کی جانب سے سعودی قیادت کو آئندہ ماہ شروع ہونے والے مقدس مہینے رمضان المبارک کے سلسلے میں نیک تمناؤں کا پیغام بھی پہنچایا۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں