قومی ٹیم کے سابق کپتان شاہد آفریدی نے فاسٹ بولر شاہین شاہ آفریدی کو کارکردگی بہتر بنانے کے لیے اہم مشورہ دیتے ہوئے کہا ہے کہ انہیں پچ کو بہتر انداز میں پڑھ کر حکمت عملی بنانی چاہیے اور ابتدا میں درست لائن و لینتھ پر توجہ دینی چاہیے۔
نجی ٹی وی سے گفتگو میں شاہد آفریدی کا کہنا تھا کہ شاہین کافی عرصے سے بین الاقوامی کرکٹ کھیل رہے ہیں، اس لیے انہیں اندازہ ہونا چاہیے کہ کس پچ پر کہاں سے مدد مل رہی ہے اور کس ایریا میں زیادہ تسلسل کے ساتھ بولنگ کرنی ہے۔
مزید پڑھیں: انجری کا شکار فاسٹ بولر شاہین شاہ آفریدی کا اہم بیان سامنے آگیا
انہوں نے کہا کہ ہر پچ پر ابتدائی گیند سے وکٹ لینے کی کوشش ضروری نہیں ہوتی۔ اگر بیٹسمین ذہنی طور پر تیار ہو کہ پہلی گیند مخصوص لائن پر آئے گی تو بولر کو حکمت عملی تبدیل کرنی چاہیے۔ شاہین کو چاہیے کہ وہ پہلے اپنی لائن سیٹ کریں اور بیٹسمین کو اپ سیٹ کریں۔
شاہد آفریدی نے آسٹریلیا کے خلاف حالیہ سیریز کا حوالہ دیتے ہوئے کہا کہ شاہین نے وہاں شاندار لائن و لینتھ کے ساتھ بولنگ کی۔ انہوں نے ابتدا میں چند گیندیں آف اسٹمپ کے باہر رکھیں اور پھر اچانک اندر آتی گیند سے بیٹسمین کو چکمہ دیا، جو مؤثر حکمت عملی تھی۔
ان کا کہنا تھا کہ اگر بیٹسمین پہلی ہی گیند اندر آنے کے لیے تیار کھڑا ہے تو ایسی صورت میں غیر ضروری رسک نہیں لینا چاہیے۔ وکٹ حاصل کرنے کے لیے محنت اور منصوبہ بندی درکار ہوتی ہے، محض معجزے کی امید نہیں رکھی جا سکتی۔
مزید پڑھیں: مچل اسٹارک کسی بھی نوجوان کرکٹر کے لیے رول ماڈل ہیں، شاہین شاہ آفریدی
شاہد آفریدی نے مزید کہا کہ جدید کرکٹ میں اکثر پچز بیٹرز کے حق میں ہوتی ہیں، اس لیے بولرز کے پاس مہارت اور اسکلز کا ہونا بے حد ضروری ہے۔ انہوں نے یہ بھی یاد دلایا کہ کرکٹ صرف ابتدائی 2 اوورز تک محدود نہیں ہوتی بلکہ اس کے بعد بھی میچ جیتنے کے مواقع موجود ہوتے ہیں۔
