پاکستانی پارلیمانی وفد، جس کی قیادت چیئرمین سینیٹ سید یوسف رضا گیلانی کر رہے ہیں، اقوام متحدہ ہیڈکوارٹر پہنچ گیا ہے تاکہ 12 اور 13 فروری کو منعقد ہونے والی 2026 آئی پی یو پارلیمانی سماعت (IPU Parliamentary Hearing) میں شرکت کرے۔
یہ بھی پڑھیں:افغانستان میں دہشتگرد گروہوں کی موجودگی سے خطے کو سنگین خطرات لاحق، اقوام متحدہ
وفد 2 روزہ سماعت کے مختلف اجلاسوں میں حصہ لے گا اور افتتاحی اجلاس میں چیئرمین سینیٹ قومی بیان بھی پیش کریں گے۔ 6 رکنی پاکستانی پارلیمانی ٹیم آئی پی یو پارلیمانی سماعت میں شرکت کے لیے نیویارک میں موجود ہے۔
چیئرمین سینیٹ سید یوسف رضا گیلانی افتتاحی اجلاس میں قومی بیان دیں گے، جس کا موضوع ہے: ’اقوام متحدہ کے 80 سال: تعاون اور شراکت داری کے ذریعے اعتماد اور مقصد کی تجدید‘۔
یہ بھی پڑھیں:تعلیم قومی ترقی، سماجی انصاف اور جمہوری استحکام کی بنیاد ہے، یوسف رضا گیلانی
اس دوران چیئرمین سینیٹ صدر جنرل اسمبلی اور صدر آئی پی یو سے بھی ملاقات کریں گے۔ وفد دو روزہ سماعت کے دوران مختلف اجلاسوں میں شریک ہو کر پارلیمانی امور اور بین الاقوامی تعاون پر تبادلۂ خیال کرے گا۔
