ٹی 20 ورلڈ کپ کے 24ویں میچ میں جنوبی افریقہ نے شاندار کارکردگی کا مظاہرہ کرتے ہوئے نیوزی لینڈ کو 7 وکٹوں سے ہرا دیا۔
احمدآباد میں کھیلے گئے میچ میں جنوبی افریقہ نے نیوزی لینڈ کی جانب سے دیا گیا 176 رنز کا ہدف 18ویں اوور میں 3 وکٹوں کے نقصان پر حاصل کر لیا۔
یہ بھی پڑھیں: ٹی20 ورلڈ کپ میں پاک بھارت دنگل، ماضی کا ریکارڈ کس کے حق میں؟
جنوبی افریقہ کے کپتان ایڈن مارکرم نے 44 گیندوں پر 86 رنز کی شاندار میچ وننگ اننگز کھیلی، جس میں 8 چوکے اور 4 چھکے شامل تھے۔
ڈیوڈ ملر 24 رنز کے ساتھ ناٹ آؤٹ رہے، ڈیوڈ بریوس اور ریان رکلٹن نے 21، 21 رنز بنائے جبکہ اوپنر ڈی کوک 20 رنز بنا کر آؤٹ ہوئے۔
نیوزی لینڈ کی جانب سے رچن رویندرا، جمی نیشم اور فرگوسن نے ایک، ایک وکٹ حاصل کی۔
اس سے قبل نیوزی لینڈ نے پہلے بیٹنگ کرتے ہوئے مقررہ اوورز میں 175 رنز بنائے اور جنوبی افریقہ کو جیت کے لیے 176 رنز کا ہدف دیا۔
یہ بھی پڑھیں: ٹی20 ورلڈ کپ: بھارت میں پاکستانی اسپنر کا خوف، سابق کرکٹر نے اپنی ٹیم کو اہم مشورہ دیدیا
مارک چیپمن کی 48 رنز کی اننگز رائیگاں گئی جبکہ ڈیرل مچل 32 رنز بنا کر آؤٹ ہوئے۔
جنوبی افریقہ کے مارکو جینسن کو 4 وکٹیں حاصل کرنے پر میچ کا بہترین کھلاڑی قرار دیا گیا، جبکہ مہاراج اور نگیدی نے ایک، ایک وکٹ حاصل کی۔
یاد رہے کہ گروپ ڈی میں شامل جنوبی افریقہ کی ٹیم نے اپنے تینوں میچ جیت کر سپر 8 مرحلے کے لیے بھی کولیفائی کرلیا ہے۔
