محکمہ ایکسائز و ٹیکسیشن اور نارکوٹکس کنٹرول خیبرپختونخوا نے قیوم اسپورٹس کمپلیکس میں چوائس نمبر پلیٹس کی نیلامی کا کامیاب انعقاد کیا، جس میں 30 نمبروں کو مجموعی طور پر 47 کروڑ 3 لاکھ روپے میں فروخت کیا گیا۔
نیلامی میں سب سے زیادہ بولی ‘داوڑ 1’ نمبر پلیٹ پر 17 کروڑ 50 لاکھ روپے کی گئی، جو انضمام الحق نے خریدی۔ دوسری بڑی بولی ‘اورکزئی 1’ نمبر پلیٹ پر لگائی گئی، جسے سابق سینیٹر اور ایم پی اے اورنگزیب خان نے 4 کروڑ 10 لاکھ روپے میں حاصل کیا۔
یہ بھی پڑھیے: خیبرپختونخوا حکومت عمران خان سمیت مختلف ناموں کی نمبر پلیٹس نیلام کرے گی
‘وزیرستان 1’ نمبر پلیٹ 4 کروڑ 6 لاکھ روپے میں فیض الرحمان نے، ‘مہمند 1’ نمبر پلیٹ 3 کروڑ 21 لاکھ روپے میں فروخت ہوئی، جبکہ ‘باجوڑ 1’ نمبر پلیٹ 3 کروڑ 35 لاکھ روپے میں عباس شاہ نے خریدی۔
مزید نمبروں میں ‘خیبر 1’ 2 کروڑ 1 لاکھ، ‘محسود 1’ 2 کروڑ 20 لاکھ، ‘گجر 1’ 1 کروڑ 63 لاکھ، ‘پشتون 1’ 1 کروڑ 32 لاکھ روپے میں فروخت ہوئیں۔ اسی طرح ‘بونیر 1’ 95 لاکھ، ‘مردان 1’ 68 لاکھ، ‘دیر 1’ 67 لاکھ، ‘جدون 1’ 71 لاکھ، ‘خلیل 1’ 65 لاکھ، ‘خٹک 1’ 61 لاکھ، ‘تاج 1’ 42 لاکھ، ‘کوہاٹ 1’ 43 لاکھ، ‘شیخ 1’ 27 لاکھ، ‘سوات 1’ 30 لاکھ، ‘ایبٹ آباد 1’ 17 لاکھ، ‘مروت 1’ 26 لاکھ، ‘سید 1’ 33 لاکھ اور ‘کلاچی 1’ 25 لاکھ روپے میں فروخت ہوئیں۔
یہ بھی پڑھیے: 22 لاکھ کی گاڑی کے لیے ڈیڑھ کروڑ روپے کی نمبر پلیٹ، پشاور میں نیا کارنامہ
وزیر ایکسائز سید فخرجہان نے کہا کہ یہ منفرد اور عوام دوست منصوبہ شفافیت، عوامی دلچسپی اور جدیدیت کی مثال ہے، اور بھرپور عوامی شرکت نے اس منصوبے کی کامیابی کو واضح کر دیا۔
انہوں نے کامیاب بولی دہندگان کو مبارکباد دیتے ہوئے کہا کہ عوام کی دلچسپی کے پیش نظر مزید من پسند چوائس نمبر پلیٹس کی نیلامی کا انعقاد کیا جائے گا۔
