سعودی عرب سمیت 8 اسلامی ممالک نے مقبوضہ مغربی کنارے کی زمینوں کو ریاستی اراضی قرار دینے کے اسرائیلی فیصلے کی شدید مذمت کی ہے۔
سعودی وزارتِ خارجہ کی جانب سے جاری مشترکہ بیان میں 8 اسلامی ممالک سعودی عرب، اردن، یو اے ای، قطر، انڈونیشیا، پاکستان، مصر اور ترکیہ کے وزرائے خارجہ نے اس اقدام کو غیر قانونی قرار دیا۔
یہ بھی پڑھیں: اسرائیل نے مغربی کنارا ضم کیا تو امریکی حمایت کھو بیٹھے گا، صدر ڈونلڈ ٹرمپ
مشترکہ بیان میں کہا گیا کہ اسرائیل کا یہ اقدام 1967 کے بعد پہلی بار مقبوضہ مغربی کنارے کی زمینوں کی رجسٹریشن اور ملکیت کے تصفیے کی منظوری دینے کے مترادف ہے، اور یہ غیر قانونی ہے۔
بیان میں مزید کہا گیا کہ اسرائیلی فیصلہ غیر قانونی بستیوں کی توسیع، زمینوں پر قبضے، اور مقبوضہ فلسطینی علاقوں پر کنٹرول مضبوط کرنے کی سنگین کوشش ہے۔
یہ بھی پڑھیں: اسرائیل نے متنازع توسیعی منصوبہ منظور کرلیا، فلسطینی ریاست کی سوچ ہی کو’مٹانے ‘ کا اعلان
مشترکہ بیان کے مطابق اسرائیلی اقدام فلسطینی عوام کے جائز حقوق کو نقصان پہنچانے کے مترادف ہے اور بین الاقوامی قوانین کی کھلی خلاف ورزی ہے۔
بیان میں کہا گیا کہ یہ اقدام دو ریاستی حل کے حصول میں رکاوٹ ہے اور خطے میں منصفانہ اور پائیدار امن کے امکانات کو نقصان پہنچانے کی کوشش ہے۔
