خیبر پختونخوا کے ضلع باجوڑ میں نامعلوم مسلح افراد کی فائرنگ سے پولیس کے 4 اہلکار شہید جبکہ 2 زخمی ہو گئے۔ حملہ افطار کے وقت تھانہ خار کی حدود بوائی کلی میں پیش آیا، جہاں خصوصی گشت پر مامور ابابیل اسکواڈ کو نشانہ بنایا گیا۔
پولیس ترجمان کے مطابق اہلکار معمول کی گشت مکمل کرکے نوائی کلے بازار سے باجوڑ پولیس لائنز واپس جا رہے تھے اور ان کی ڈیوٹی کا وقت ختم ہونے والا تھا کہ اسی دوران گھات لگائے مسلح افراد نے فائرنگ کر دی۔ شدید فائرنگ کے نتیجے میں 4 اہلکار موقع پر ہی شہید ہو گئے جبکہ دو اہلکار زخمی ہوئے۔
یہ بھی پڑھیں:ڈی آئی خان: گنڈاپور گروپ کے 4 فتنہ الخوارج دہشتگرد ہلاک، سیکیورٹی فورسز کا کامیاب آپریشن
شہید ہونے والوں میں یار زادہ، داؤد خان، عمران خان اور سراج خان شامل ہیں، جبکہ ارشاد خان اور عزیزالرحمان زخمی ہوئے۔ زخمی اہلکاروں کو فوری طور پر ڈسٹرکٹ ہیڈکوارٹر اسپتال خار منتقل کیا گیا جہاں انہیں طبی امداد فراہم کی جا رہی ہے۔
واقعے کے بعد پولیس کی بھاری نفری نے علاقے کو گھیرے میں لے کر سرچ آپریشن شروع کر دیا، تاہم آخری اطلاعات تک کسی ملزم کی گرفتاری عمل میں نہیں آ سکی۔
واضح رہے کہ خیبر پختونخوا میں حالیہ دنوں سکیورٹی فورسز پر حملوں میں اضافہ دیکھنے میں آیا ہے۔ گزشتہ روز کوہاٹ میں پولیس پر حملے میں ڈی ایس پی سمیت 5 اہلکار شہید جبکہ 6 زخمی ہوئے تھے، جبکہ اس سے قبل کرک میں ایف سی اور ایمبولینس پر حملوں کے واقعات بھی پیش آ چکے ہیں۔
