وزیراعظم شہباز شریف نے صوبائی حکومتوں کو ہدایت کی ہے کہ پیٹرولیم مصنوعات کی ذخیرہ اندوزی میں ملوث عناصر کے خلاف سخت قانونی کارروائی کی جائے۔
یہ بھی پڑھیں: وزیراعظم شہباز شریف کا آذربائیجان کے صدرسے رابطہ، ڈرون حملوں کی مذمت
یہ ہدایات انہوں نے اسلام آباد میں پیٹرولیم مصنوعات سے متعلق ایک اعلیٰ سطح کے اجلاس کی صدارت کرتے ہوئے جاری کیں۔
وزیراعظم نے کہا کہ جو بھی پیٹرول پمپ مصنوعی قلت پیدا کرنے جیسی غیر قانونی سرگرمی میں ملوث پایا جائے، اسے فوری طور پر بند کیا جائے اور آئل اینڈ گیس ریگولیٹری اتھارٹی (اوگرا) اس کا لائسنس منسوخ کر کے قانونی کارروائی شروع کرے۔
مزید پڑھیے: وزیراعظم شہباز شریف نے ہندوؤں کے مذہبی تیوہار ہولی پر اپنے پیغام میں کیا کہا؟
شہباز شریف نے وزیرِ پیٹرولیم کو ہدایت کی کہ وہ صوبوں کا دورہ کریں اور صوبائی حکومتوں کے ساتھ مل کر پیٹرولیم مصنوعات کے مؤثر استعمال اور عوام کو بلا تعطل فراہمی یقینی بنانے کے لیے ایک جامع لائحہ عمل تیار کریں۔
وزیراعظم نے مزید ہدایت کی کہ پیٹرولیم مصنوعات کی ترسیل اور نقل و حرکت کی نگرانی کے لیے ایک ڈیش بورڈ قائم کیا جائے جس کے ذریعے صوبوں کو حقیقی وقت میں معلومات فراہم کی جائیں گی اور ترسیل کے عمل کی کڑی نگرانی ممکن ہو سکے گی۔
مزید پڑھیں: عالمی صورتحال: وزیراعظم کا سیاسی قیادت کو اعتماد میں لینے کا فیصلہ، اپوزیشن کو بھی دعوت
اجلاس کو خطے کی بدلتی صورتحال کے تناظر میں پیٹرولیم مصنوعات کے ذخائر سے متعلق تفصیلی بریفنگ بھی دی گئی۔ بریفنگ میں بتایا گیا کہ ملک کی ضروریات پوری کرنے کے لیے پیٹرولیم مصنوعات کے وافر ذخائر موجود ہیں۔
